له یوکال ځنډ وروسته د نورستان روغتیايي مرکزونو ته معاشونه او درمل ولېږل شو
په نورستان کې صحي کار کوونکو په تېر یو کال کې د معاشونو د نه ورکړې او په روغتیايي مرکزونو کې د درملو او نورو اسانتیاوې د نشتون له امله ډېرې ستونزې وګاللې، تېر حکومت يې په ځلونو د حلولو ژمنې کړې وې، خو پرې بریالي نه شول.
د ۲۰۲۱ میلادي کال د اکتوبر له لومړۍ نېټې دغه روغتیايي مرکزونه د سویډن موسسې ته په قرارداد ورکړل شوي چې مسولین يې وايي، ټولو ته يې درمل رسولي او صحي کار کوونکو ته هم د معاشونو د وېش لړۍ پیل شوې ده.
په نورستان کې د سویډن موسسې مشر ډاکټر عبدالله روان ازادي راډیو ته وویل: "د نورستان ټول کلنیکونه پوره درمل لري او ټول فعاله دي. دوی ته د ناروغانو او نوکریوالانو د ډوډۍ لګښتونه هم ورکړل شوي دي. د کوټو ګرمولو لپاره د سونګ موادو اخیستلو پېسې هم ورکړل شوي دي. د معاشونو ورکړه پرون پیل شوې او ټول کار کوونکي به سبا او یا هم بله ورځ د اکتوبر میاشتې معاشونه ترلاسه کړي."
ښاغلی روان زیاتوي چې د نورستان صحي کار کوونکو په تېر یوه کال کې د ډېرو ستونزو سربېره بیا هم د خپلو ولسونو خدمت کړی او دوی ډاډ ورکوي چې سویډن موسسه به قرارداد کې ذکر شوي ټولې اسانتیاوې برابروي.
د یاد ولایت روغتیايي کارکوونکي هم په دې خوښ دي چې له یوه کال هلو ځلو او شکایتونو وروسته دوی ته معاشونه او روغتیايي مرکزونو ته درمل رسول کېږي.
د دواب ولسوالۍ د روغتیايي مرکز کار کوونکی عبدالصبور کریمي وایي: "شکر چې د نورستان روغتیايي کار کوونکو ته له یوه کال ځنډ وروسته د یوې میاشتې معاش د سویډن موسسې له خوا ورکړل شول. روغتيايي مرکزونو ته درمل او نور لازم شیان هم لېږل شوي دي. د نورستان ولسونه او په ځانګړي ډول صحي کار کوونکي د ازادي راډیو له محترمې ادارې څخه مننه کوي چې هر وخت يي زموږ د مظلومیت او محرومیت اواز نړۍ او افغان چارواکو ته رسولی او په برکت يې زموږ ډېری ستونزې حل شوي دي."
صحي کارکوونکي له طالب مشرانو د اهېډ موسسې مسولینو سره د دوی د یوه کال د معاشونو او د بې وسه نورستانیانو حقوقو حساب کول غواړي.
د نورستان اوسیدونکي وايي، په افغانستان کې د طالبانو قدرت له رسېدو سل ورځې پوره شوې او په دې سلو ورځو کې يې څو ځله ژمنه کړې چې د اهېډ موسسې مسولینو څخه به د نورستان د روغتیايي کار کوونکو د معاشونو او خلکو ته د خدماتو د سم نه عرضه کولو پوښتنه کوي.
خو د تېر حکومت د چارواکو په څېر دوی لا هم په دې نه دي بریالي شوي چې د اهیډ موسسې مشران پیدا او حساب ورسره وکړي.
د خلکو په خبره چې د اهېډ په نوم موسسې د سمنګان او تخار اوسیدونکي او صحي کار کوونکي د نورستانیانو په څېر ستونزو سره مخ کړي وو.
په تېر یوه کال کې ازادي راډیو ډېرې هڅې وکړې چې د یادو ستونزو په اړه د اهېډ همکارې موسسې د مسولینو نظر هم واخلي خو خبرو ته نه دي حاضر شوي.
طالبانو هم د روغتیايي کار کوونکو د غوښتنې په اړه تازه څه نه دي ویلي.