SHSKUK: Mbi 80 pacientë me COVID-19 duke u trajtuar në spitale

Shërbimi Spitalor Klinik Universitar i Kosovës ka njoftuar të shtunën (07 gusht ) se, 83 pacientë të diagnostikuar me COVID-19 po trajtohen në Qendrën Klinike Universitare të Kosovës (QKUK), Klinikat COVID dhe spitalet e përgjithshme rajonale.


"114 pacientë të shtrirë në klinikat Covid dhe spitalet e përgjithshme, prej tyre 83 të konfirmuar COVID-19, 75 me trajtim në oksigjeno-terapi", thuhet në njoftim.


Gjatë periudhës së fundit në Kosovë janë rritur rastet e reja me koronavirusin e ri. Të premten Kosova regjistroi 271 raste të reja.




Instituti Kombëtar i Shëndetësisë Publike (IKSHPK), edhe të shtunën, u bëri thirrje qytetarëve që të vaksinohen.


“Vaksinimi është metoda më e mirë, më e lirë dhe me efikase në luftë kundër COVID-19”, thuhet në një postim të IKSHPK-së në rrjetin social Facebook.


Në Kosovë, qytetarët mund të zgjedhin nëse duan të vaksinohen me vaksinën AstraZeneca apo Pfizer.


Qeveria e Kosovës mëton që deri në fund të këtij viti të imunizojë kundër koronavirusit 60 për qind të popullatës.