Patti Smith në mbështetje të REL-it mes kërcënimeve për ndërprerjen e financimit

Këngëtarja amerikane, poetja dhe aktivistja Patti Smith ka shprehur mbështetje për Radion Evropa e Lirë, duke kujtuar rëndësinë e gazetarisë së pavarur dhe duke përmendur kërcënimet për financimin e kësaj media nga administrata aktuale amerikane.

Gjatë një koncerti të mbajtur më 19 korrik në Pragë, ku gjendet edhe selia qendrore e REL-it, këngëtarja 78-vjeçare para se të niste këngën e saj People Have the Power, tha se ia kushtojë këtë këngë “Steve dhe të gjithëve në Radion Evropa e Lirë”, duke iu referuar presidentit të REL-it, Stephen Capus.

Smith, një nga zërat origjinal gjatë lindjes së skenës së punk rokut në Nju Jork në mesin e viteve ’70, lavdëroi punën e REL-it dhe “shumë institucioneve të rëndësishme publike”, duke vënë në pah rolin e tyre për shpërndarjen e “informacioneve të rëndësishme te njerëzit në komunitetet rurale në mbarë botën”, teksa shtoi se këto institucione “po mbesin pa fonde nga administrata aktuale e shtetit tim”.

“Ne duhet të vazhdojmë të luftojmë dhe të ndihmojmë njëri-tjetrin”, shtoi ajo.

Me seli në kryeqendrën e Republikës Çeke që nga viti 1995, Radio Evropa e Lirë transmeton lajme të pavarura në 27 gjuhë në shtete ku liria e shtypit është e ndaluar apo nuk është e konsoliduar plotësisht.

Mbështetja e Smithit vjen në kohën kur e ardhmja e transmetuesve ndërkombëtarë, të financuar nga SHBA-ja, përfshirë Radion Evropa e Lirë, është e pasigurt për shkak të propozimeve për shkurtime buxhetore dhe ndryshim të prioriteteve politike në Uashington.

REL-i, së bashku me transmetuesit e tjerë të financuar nga Qeveria, sikurse Zëri i Amerikës, Radio Azia e Lirë, Zyra e Transmetimeve për Kubën (Radio Marti), Rrjetet e Transmetimit për Lindjen e Mesme (MBN) dhe Fondi i Teknologjisë së Hapur, janë në një situatë të vështirë që kur presidenti amerikan, Donald Trump, nënshkroi një urdhër ekzekutiv që goditi Agjencinë Amerikane për Media Globale (USAGM).

USAGM është agjenci e pavarur qeveritare që mbikëqyr disa transmetues të financuar nga SHBA-ja, të cilët së bashku shpërndajnë lajme dhe informacione në gati 50 gjuhë për rreth 361 milionë njerëz çdo javë.

Kërcënimi për financimin e transmetuesit ka nxitur një valë të mbështetjes globale nga organizatat e mbrojtjes së mediave, analistë, avokues të demokracisë, si dhe nga audiencat në 23 vende ku transmeton REL-i.

Smith nuk është artistja e parë që ka folur në mbrojtje të REL-it.

Më herët këtë vit, grupi muzikor R.E.M. ripublikoi këngën Radio Free Europe për të shënuar Ditën Botërore të Lirisë së Shtypit dhe për të vënë në pah punën e organizatës në mbështetje të gazetarisë së pavarur dhe të së vërtetës, në vende ku ajo është më së shumti e kërcënuar.

“Qoftë muzika apo shtypi i lirë – censura kudo është kërcënim për të vërtetën”, deklaroi këngëtari kryesor i grupit Michael Stipe, duke shtuar se grupi po “dërgonte një përshëndetje për gazetarët e guximshëm në Radion Evropa e Lirë”.

Edhe anëtari tjetër i R.E.M., Mike Mills ka ofruar mbështetje për REL-in.

“Gazetarët e REL-it kanë zemëruar diktatorët për 75 vjet. E dini se po e bëni punën mirë kur bëni armiqtë e duhur”, tha ai.