Як кӯдаки афғон дар чархи ҳавопаймо худро аз Кобул ба Деҳлӣ расонд
Расонаҳои ҳиндӣ гузориш додаанд, ки як кӯдаки 13-солаи афғон ба шакли қочоқӣ худро дар чархи ҳавопаймои ширкати "Ком эйр" аз Кобул то Деҳлӣ расонида буд, зинда монд ва ба Афғонистон баргардонида шуд.
Ба навиштаи рӯзномаи "Hindustan Time", ин ҳодиса дар парвози рӯзи якшанбеи ширкати "Ком эйр", 21 сентябр рух додааст. Масъулини фурудгоҳи Индира Гандӣ дар Деҳлӣ рӯзи 22 сентябр гуфтанд, ки ин кӯдак пас аз фуруди ҳавопаймо пайдо шуд.
Ӯ ба масъулин гуфтааст, пинҳонӣ вориди фурудгоҳи Кобул шуда, пеш аз парвоз дар чархи ҳавопаймо пинҳон шудааст.
Мақомҳои Толибон то кунун дар ин боар изҳори назар накардаст.
Пинҳон шудан дар зери баданаи ҳавопаймо яке аз шеваҳои қочоқ ба муҳоҷират мебошад. Парвоз дар баландии зиёд, маъмулан бинобар сармои шадид ва камбуди оксиген, боиси марги фард мешавад.