Узбекистон ба "рейд"-и ФСБ ба консерти муҳоҷирон вокуниш кард

Мақомоти Узбекистон ба "рейд" ва боздошти чанд нафар дар вақти консерти як ҳунарманди узбек дар Русия вокуниш карданд.

Оҷонсии муҳоҷирати Узбекистон гуфт, консерти Ҷалолиддин Аҳмадалиев қаблан бо мақомоти маҳалли минтақаи Красноярск мувофиқа нашуда буд ва зоҳиран ин кор боиси гузарондани "рейд" гардид.

Мақомоти Узбекистон гуфтанд, барои ҳимояи ҳуқуқи шаҳрвандони ин кишвар вакили дифоъ гирифтаанд.

Шаби 23-юми сентябр нерӯҳои пулис "ОМОН"-и Русия вориди як маросими хурсандии муҳоҷирони зодаи Осиёи Марказӣ шуда, даҳҳо нафарро боздошту бозпурсӣ карданд.

Пулис дар хабарномааш гуфтааст, ки дар ин маросим 620 нафар ширкат дошт ва онҳо "амалиёти зидди маводи мухаддир" анҷом доданд.

Дар навори нашркардаи пулис дида мешавад, ки онҳо гурӯҳе аз меҳмонони маҳфилро даст пушти ҳам бо автобус ба шӯъбаи пулис мебаранд.

Консулгарии Узбекистон дар Новосибирск гуфтааст, гузарондани чунин "рейд" бояд асоси қонунӣ дошта бошад ва фароғати шаҳрвандонро халалдор насозад.

Мақомоти интизомии Русия чанд соли ахир бо бадтарин шева бо муҳоҷирон бархӯрд карда, бе огоҳӣ ба ҷои хобу кори онҳо ҳамла мекунанд.