Узбекистон раводидро барои шаҳрвандони Амрико бекор мекунад
Узбекистон аз соли 2026 раводиди сафар ё визаро барои шаҳрвандони Иёлоти Муттаҳидаи Амрико бекор мекунад.
Дар ин бора дар фармони президенти Узбекистон Шавкат Мирзиёев аз 3-юми ноябр таъкид шудааст.
Бар асоси ин санад, аз моҳи январи соли оянда шаҳрвандони Амрико ҳақ доранд, ки бидуни виза ё раводид то 30 рӯз дар хоки Узбекистон бимонанд.
Дар фармон ҳадафро аз ин кор "густариши ҳамкориҳои тиҷоратию иқтисодӣ ва фарҳангиву ҷаҳонгардӣ" номидаанд.
Ин тасмим дар замоне эълон шуд, ки Шавкат Мирзиёев ва раҳбарони дигари кишварҳои Осиёи Марказӣ барои мулоқот бо Доналд Трамп, раисҷумҳури Амрико ба Вашингтон мераванд. Нишасти C5+1 (Осиёи Марказӣ ва Иёлоти Муттаҳида) рӯзи 6-уми ноябр баргузор хоҳад шуд.
Аз соли 2021 дар Узбекистон барои шаҳрвандони Амрико, ки синнашон аз 55 болост ва бо ҳадафи сайёҳӣ ворид мешаванд, низоми бе раводид барои 30 рӯз амал мекунад.