Мақомоти тоҷик мегӯянд, "талафоти нерӯи барқ кам шуд"

Мақомоти тоҷик мегӯянд, баъд аз ҷорӣ шудани ҷазои ҷиноӣ барои истифодаи ғайриқонунии барқ талафоти нерӯи барқ кам шудааст.

Барои дуздӣ ё истифодаи ғайриқонунии нерӯи барқ имсол дар Тоҷикистон аз 27 ҳазор сомонӣ ҷарима то 10 сол зиндонро пешбинӣ карданд.

Бино ба иттилои ниҳоди навтаъсиси Оҷонси назорати давлатии энергетикӣ, дар 9 моҳи соли равон сарфаи беҳуди нерӯи барқ қариб се дарсад коҳиш ёфтааст.

Кормандони ин ниҳод якҷоя бо Додситонии шаҳри Душанбе рӯзи 11-уми ноябр дар хиёбонҳои шаҳр ҳамчунин ба сокинон тарзи истифодаи сарфакоронаи нерӯи барқро фаҳмонда, аз онҳо даъват кардаанд, ки барқро беҳуда истифода набаранд.

Ин даъват дар шабу рӯзе сурат мегирад, ки сокинони чанд гӯшаи пойтахт аз он шикоят доранд, ки соатҳо барқ надоранд.

Баъзе аз сокинон, аз ҷумла дар ноҳияи Сино, мегӯянд, зоҳиран дар хонаҳои онҳо ҳам лимити барқ ҷорӣ шудааст ва чанд рӯз боз аз соати 9-и субҳ то 5-6-и бегоҳ бе барқ мемонанд.

Мақомот камбуди барқро дар пойтахти кишвар шарҳ надодаанд.