Саодат Амиршоева, нахустин зан-генерали тоҷик даргузашт

Генерал Саодат Амиршоева, яке аз вакилони дар гузашта пуровозаи порлумони Тоҷикистон субҳи 14-уми январ дар 73-солагӣ даргузашт.

Дар ин бора як дӯсти хонаводаи ӯ ба Радиои Озодӣ хабар дод. Ба гуфтаи вай, Амиршоева чанд вақти ахир бемор буд. "Тақрибан як соли пеш писараш вафот карда буд ва Амиршоева баъди ин ҳодиса ба худ наомад".

Саодат Амиршоева, нахустин генерали тоҷик аз миёни занон аст. Вай чандин сол дар ниҳодҳои ҳифзи ҳуқуқ ва қонун, дар маснадҳои раҳбарӣ, аз ҷумла ба ҳайси сардори Раёсати адлия дар вилояти Хатлон кор кардааст. Замони фаъолияташ чун вакили Маҷлиси намояндагони Тоҷикистон бо чанд пешниҳодаш пурсару садо шуда буд.

Ӯ гуфта буд, духтарони тоҷик набояд шавҳари хориҷӣ кунанд ва санҷиши бакорати душизагон як таҳқир аст ва аммо муҳимтарин пешниҳодаш манъи издивоҷи хешу таборӣ буд. Порлумони Тоҷикистон онро пазируфт ва қонунӣ кард.

Саодат Амиршоева соли 1953 дар деҳаи Паранаки ноҳияи Ховалинг таваллуд шудааст. Дар назар аст маросими видоъ бо ҳуқуқшиноси тоҷик имрӯз 14-уми январ дар манзили зисташ, ҷамъати Бустонқалъаи ноҳияи Кушониён баргузор шавад.