"Даромад кам бошад, патент бекор мешавад". Тарҳи нав барои муҳоҷирон

Ҳукумати Русия ба Думаи давлатӣ пешниҳод кардааст, ки асосҳо барои рад кардани иҷозатномаи кор ё патент барои муҳоҷирон бештар карда шаванд.

Бар асоси лоиҳаи қонун, ки дар сомонаи Дума нашр шуд, мақомоти андоз ба таври худкор (автоматӣ) дар бораи даромади шаҳрвандони хориҷӣ ба Вазорати корҳои дохилии Русия маълумот ирсол мекунанд. Дар сурати пешниҳод нашудани ин маълумот, мақомоти Русия метавонанд ба муҳоҷир патент надиҳанд ё иҷозатномаи кории ӯро, ки пештар гирифта буд, бекор созанд.

Ҳамчунин дар ҳолати аз маоши ҳадди ақал камтар будани даромади муҳоҷир, патенти ӯ метавонад бекор карда шавад. Онҳое, ки бори аввал барои гирифтани патент ҳуҷҷат месупоранд аз ин тартиб озод ҳастанд.

Дар сурати қабули ин қонун тартиби гирифтани ҳаққи иқомат дар Русия ва бекор шудани ин ҳуҷҷат низ тағйир меёбад. Бар асоси ин санад, шаҳрвандони хориҷӣ барои гирифтани ҳаққи иқомати Русия бояд маълумот дар бораи даромадро ҳар семоҳа пешниҳод кунад. Дар ҳолати аз маоши ҳадди ақал кам будани даромади муҳоҷир давоми 10 моҳ, ҳаққи иқомати ӯ дар Русия бекор карда мешавад.

Ҳанӯз маълум нест, ки Дума кай ин қонунро баррасӣ мекунад.

Вакилон ва мансабдорони Русия бо қабули даҳҳо тарҳ қариб дар тамоми бахшҳои кору зиндагии муҳоҷирон дар ин кишвар, аз истифодаи замимаву паёмрасонҳои мобилӣ гирифта, то қоидаи убури марзу вуруд ба кишварро дигар карданд. Шумораи қонунҳои нав ва тағйиру иловаҳо танҳо дар соли 2025 аз 35 адад гузаштааст.