Гузоришҳо аз кушта шудани як зани тоҷик дар Афғонистон
Як зани пизишк аз Тоҷикистон дар вилояти Кундузи Афғонистон кушта шудааст. Дар ин бора телевизиони "Афғонистон интернешнл" ва рӯзномаи "Ҳашти субҳ"-и чопи Кобул рӯзи 15-уми март хабар доданд.
Ба гуфтаи ин манобеъ, ҳодиса се рӯз пеш рух дода, афроди ношинос Адолат Ҳамидиро дар манзилаш дар ноҳияи Имом Соҳиби вилояти Кундуз ба қатл расондаанд. Ин ноҳия дар наздикии марзи Тоҷикистон ҷойгир шудааст.
Дар хабар омадааст, ин зан давоми 15 соли ахир пизишки занон буд. Ин шаҳрванди Тоҷикистон бо як марди афғонистонӣ издивоҷ карда, як духтар ҳам доштааст.
Рӯзномаи "Ҳашти субҳ" гузориш додааст, ки ҷасади ин занро ба Тоҷикистон фиристодаанд.
Мақомоти Тоҷикистон дар ин бора расман хабар надодаанд.
Ҳанӯз сабабҳои кушта шудани ин зан ва номи қотилон маълум нест. Мақомоти ҳукумати Толибон дар ин бора сукут ихтиёр кардаанд.