Türkmenistan iş başyndaky awtokrat prezidentiň oglunyň ýeňmegine garaşylýan saýlaw geçirýär
Türkmenistanda 12-nji martda irki prezident saýlawy geçirilýär, bu göçüm umuman iş başyndaky awtokrat prezident Gurbanguly Berdihamedowyň syýasy häkimiýeti öz ogly Serdara geçirmek üçin gurnan resmi çäresi hasaplanýar.
TDH-nyň maglumatyna görä, ýerli wagt bilen ir sagat 9-a çenli saýlawçylaryň 25,24% ses berdi.
Saýlawçylar Ahal welaýatynda 25,03%, Balkan welaýatynda 27,40%, Daşoguz welaýatynda 25,68%, Lebap welaýatynda 24,37%, Mary welaýatynda 24,64%, Aşgabat şäherinde 25,78% ses berdiler diýip, Türkmenistanda saýlawlary we sala salşyklary geçirmek barada merkezi toparyň resmi web-saýtynda aýdylýar.
Saýlawda 40 ýaşly Serdar Berdimuhamedow bilen birlikde ýene sekiz kandidat döwletiň iň uly wezipesi üçin bäsleşige gatnaşýar. Emma ol dalaşgärleriň ählisi prezidente ygrarly adamlar hökmünde tanalýar we hakyky bäsdeş hasaplanmaýar.
Iş başyndaky prezident, häkimiýet başynda bolmagynyň 15 ýyllygyny bellän G.Berdimuhamedow biraz öň pygamber ýaşyny ýaşandygyna salgylanyp, 11-nji fewralda mejlisiň ýokarky palatasyna häkimiýetiň “ýaş ýolbaşçylara” berilmegini golaýdandygyny we özüniň prezidentlikden çekiljekdigini aýdanyndan soň, irki prezident saýlawlaryna taýýarlyk görülmegini tabşyrdy.
Synçylaryň köpüsi muny onuň häkimiýeti sentýabr aýynda 40 ýaşyny dolduran ogluna geçirmäge gören taýýarlygynyň görkezijisi hasaplady we şol günüň ertesi ýurduň hiç bir erk-ygtyýarsyz parlamenti irki ses berişligiň gününi kesgitledi.
Türkmenistanyň Konstitusiýasyna laýyklykda, prezident bolmak üçin talap edilýän iň pes ýaş dalaşgäriň 40 ýaşamagy bolup durýar we, Serdar Berdimuhamedow 15-nji fewralda Türkmenistanyň dolandyryjy Demokratik partiýasynyň hödürlän dalaşgäri hökmünde resmi taýdan hasaba alyndy.
Türkmenistanda 1991-nji ýylda garaşsyz ýurt bolany bäri geçirilen saýlawlaryň hiç biri hukuk toparlary we günbatar saýlaw gözegçileri tarapyndan hiç wagt azat we adalatly diýlip atlandyrylmady.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.