Baluh Qırımdaki Ukrain medeniyet merkeziniñ faallerine mektüp yazdı: «Vatandaşlığımnı tutıp almağa isteyler»
Qırımda mahküm etilgen ve Rusiyeniñ Tver vilâyetindeki Torjok şeeriniñ №4 tüzetüv koloniyasınıñ ceza izolâtorında tutulğan ukrain faali Volodımır Baluh Qırımda işğalden soñ qurulğan Ukrain medeniyet merkeziniñ faallerine mektüp yazdı. Bu aqta faal Alena Popova Facebookta bildirdi.
«Baar körünmey – ne Rusiye Federatsiyasınıñ qıyış adliyesi ile «iş birliginde», ne de ceza izolâtorınıñ daima suvuq kamerası ve parmaqlıq arasından körüngen sıtıq ve sert köküniñ müitinde ve 24 saat ve 7 kün boyunca olğan üşüp qaltıravda… Elbette, haberiñiz bardır, vatandaşlığımnı bile tutıp almağa isteyler – Qırımda qayd olğanım içün meni Rusiye Federatsiyasınıñ vatandaşı dep sayğanlarından sebep Ukraina konsulınen körüşmege izin bermediler! Mezmurlarnıñ kerçegi mında qayda eken: «Bir faydası olmağan insan oğulları köterilgende er yerde dinsizler yüre»… Er keske menden selâm aytıñız, siziñ dualarıñıznen evge hayırlısınen qaytacağıma işançım bitmez», – dep yazdı Baluh mektüpte.
Popovanıñ aytqanına köre, Baluh mayısnıñ 10-nda mektüp yazdı, o, mayısnıñ 13-nde keldi.
Advokat Olga Dinze mayısnıñ 7-nde qırımlı ukrain faali Volodımır Baluhnı ziyaret etti. Onıñ aytqanına köre, o, ceza izolâtorında tek ötmek aşay ve suv içe. Advokatnıñ aytqanına köre, sağlıq vaziyeti «bayağı fenalaştı».
Aq qorçalayıcılarnıñ malümatına köre, bu sefer ukrainalı mayısnıñ 19-na qadar ceza izolâtorında qalacaq. Bu aqta koloniya memuriyeti bildirdi.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti. Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı.