"Skit altını" davası: mahkeme, mahkemeciniñ vazifeden alınmasını aqqında qararnı oktâbrniñ soñunda alacaq
Amsterdam Apellâtsiya mahkemesi oktâbr 28-inde "skit altını" davasını alıp barğan mahkemeciniñ vazifeden alınması aqqında qararnı alacaq. Muracaatnı Ukraina tarafı yolladı, bildire "Ukrinform".
Bu oturışta bir mahkemeci yaramadı, ondan sebep teneffüs yapıldı. Keççe reis mahkemeci, o adamsız qarar alınıp olamacağını bildirdi.
"Bugünki oturışnıñ vaqtında Ukrainanıñ vekilleri olğan eki Felemenk advokatı çıqışta bulundı. Ukraina tarafı vazifeden almaq istegen mahkemeci çıqışını bitirip yetiştirmedi. Mahkeme, mahkemeci yaramağanından sebep teneffüsni ilân etti", - denile beyanatta.
Teneffüsten soñ, Qırım müzeyleriniñ ve Alladr Pirson müzeyiniñ advokatları çıqışlarını yazı şekilde berecekleri aqqında qarar alındı.
500-den ziyade müzey eşyasından ibaret «Qırım: altın ve Qara deñizniñ sırları» sergisi 2014 senesi yanvarniñ 19-nda Almaniyanıñ Bonn şeerindeki Reyn ülkeşınaslıq müzeyinde keçirilgen edi. Daa soñra Amsterdamdaki Allard Pierson arheologik müzeyinde açıldı. Sergi 2014 senesi fevralniñ 7-nden avgustnıñ 31-ne qadar devam etti, faqat Rusiyeniñ Qırım işğalinden sebep Qırım müzeylerine qaytıp olamadı.
Qırımnıñ dört müzeyi eksponatlarnıñ qaytarıluvınen bağlı davanı Allard Pierson müzeyine qarşı açtırğan edi. Ukraina akimiyeti artefaktlar müzeylerniñ mülki degil, Ukraina devletine ait, dep bildirdi. Felemenk müzeyi qadı qararı olmağan soñ ya da taraflar añlaşqanına qadar eksponatlarnı bermemege qarar aldı.