Novofedirivkadaki uçaq alanında patlavlar. Bu ne edi ve ne belemek kerek?

Avgustnıñ 9-nda işğal etilgen Qırımnıñ Saq rayonındaki Novofedirivka qasabasında arbiy uçaq alanındabir qaç patlav yüz berdi. "Birinci patlav saat 15:20-de oldı, umumen on patlav aqqında aytıta. Qomşu evler zarar kördi, dep haber etile", – dep "Mash na volne" telegram kanalı haber etti. Patlav olğanını Qırımnıñ işğalci akimiyetine yaqın "Krıminform" neşiri tasdıqladı.

Qırımnıñ Rusiye yolbaşçısı Sergey Aksenov adise yerine bardı. Rusiye akimiyeti «yaqın evlerden» 30 insan tahliye etildi, dep bildirdi. Umumiy tahliye olmadı.

Rusiye Mudafaa nazirligi Novofedirivkada (Saq) arbiy uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. «İnterfaks» Rusiye neşiri Rusiye Federatsiyasınıñ Mudafaa nazirligindeki menbasına esaslanıp haber etkenine köre, müessise patlavlarnıñ esas sebebi olaraq «yanğın telükesizligi qaideleriniñ bozuluvını» saya.

Ukrayina Mudafaa nazirligi Novofedirivka qasabasındaki Rusiye arbiy aerodromında patlavlarnı izaatlap, müessise «yanğın sebeplerini bilmey», dep qayd etti.

Qırımnıñ Saq rayonındaki Novofedirivka qasabasında arbiy uçaq alanında patlavlar neticesinde doquz kişi zarar kördi, dep haber ete Qırımnıñ Rusiye Sağlıq nazirligi.

«Eki bala olğan yedi zarar körgen kişi «Saq rayon hastahanesine» alıp ketirildi. Altısı ambulator tibbiy yardım kördi, yedincisi hastahanede tedaviylenecek. Zarar körgen eki kişi «№6 Aqmescit şeer hastahanesine» tibbiy yardım içün muracaat etti. Alları orta ağır, kerekli yardım kösterilgen soñ olarnı evge yolladılar», – dep aytıla haberde.

Arbiy uçaq alanında patlavlar neticesinde zarar körip, tibbiy yardım içün 13 kişi muracaat etken. Bunı avgustnıñ 10-nda saba Qırımnıñ Rusiye Sağlıq nazirligi haber etti. 

"Avgustnıñ 10-da saba saat 8.30 Saq rayonındaki Novofedirivka qasabasında yüz bergen adise neticesinde 15 kişi yaralandı, 1 kişi öldi", - dep yazıla bildirmede. 

Qayd etilgeni kibi 12 kişiniñ yengil yaraları bar eken, olarğa ambulator yarlım kösterilgen. Daa bir kişiniñ orta dereceli yaraları bar eken, o Saq hastahanesine yatqızılğan.

Ukrayinalı arbiy ekspert Oleg Jdanov Novofedirivkadaki uçaq alanını Rusiyeniñ bugünge qadar qullanğan pek müim arbiy obyekt kibi saya. Onıñ haber etkenine köre, qırım işğal etilmezden evel anda Ukrayina arbiy deñiz bazası edi.

"Bu Qırımnıñ eñ büyük uçaq alanıdır. Sovet devrinde Tu-22 uzaq menzilli bombardıman uçaqları anda yerleşe edi. Bunı tasavur ete bilesiñizmi?", - dey Ukrayina global araştırmalar merkeziniñ programmalar reberi Pavlo Lakiyçuk.

Ekspertniñ sözlerine köre, Novofedirivkada daima tahminen 2-3 aviatsiya polku yerleşe. Qırım.Aqiqatqa bergen izaatında o, Novofedirivkada NİTKA deñiz aviatsiyası içün meşur yerdeki talim kompleksiniñ yerleşkenini de hatırlata. Bundan ğayrı, onıñ qayd etkenine köre, anda Qırımnıñ er bir yerinden kelgen uçaqlar tamir etile.

"Uçaq alanındaki uçaqlar ile bir-eki afta içindeki satellit süretlerge baqsañız, "Kinjallarnı" atqan MiG-31 uçaqları anda bulunğanını körersiñiz", - dey Lakiyçuk. Onıñ fikrince andaki aviatsiya bazası Ukrayinadki arbiy areketlerde faal sürette iştirak ete.

Novofedirivkada avağa uçqan uçaqlar Ukrayinanıñ topraqlarına qarşı raketa ve bomba darbelerini endirgenini Ukrayina Silâlı Quvetleriniñ polkovniki Vladislav Seleznev de dey. "Olar qanatlarında ölüm ve yıqıluv taşıdılar. Bu kibi areketler Ukrayina raketçikleriniñ imkânlarınıñ emiyetli derecede artqanını köstere"6 - dedi o.

Öz menbalarına atfı etip, Seleznev Novofedirivkanıñ yaqınlarındaki Saqta adamlar arasında telâş çıqqan. Qasabanıñ sakinleriise acele evlerini terk etip keteler.

Qırımnıñ Rusiye akimiyeti buña dair resmiy malümat bermey. 

Qırım sakinleri neni beklemek kerekler? Oleg Jdanovnıñ fikrince Ukrayina ordusınıñ Rusiyeniñ işğal etilgen Qırımdaki arbiy obyektlerine darbeleri devam etecek. "Ve Qırımdaki nişanlarnı yoq etip başlağanımız pek yahşı", - dep saya o. 

Öz nevbetinde Vladislav Seleznev qayd ete ki, yüksek hassas raketalarnıñ hususiyetleri olarnıñ mutlaq doğrulığındadır.

"Qırımdan bizim şeer ve köylerimizge darbeler endirile6 Qırımdar darbe endirgen uçaqlar uça, Aqyardan raketalar uçurtqan gemiler kele. Er kes pek yahşı bile ki, duşman tarafından raketa telükesini yoq etmek içün bu silânıñ taşıyıcılarını, anbarlarını yoq etmek kerek", - dey Pavlo Lakiyçuk. O, Qırımdaki uçaq alanlarınıñ stutusı ve arbiy ceetten emiyetine köre sıralay: Novofedirivka, Belbek, Sarabuz.

MALÜMAT: Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.