Новости за 30.12.2025

Татарстанда якындагы тәүлектә буран көтелә. Күрү мөмкинлеге бер-ике километрга кадәр начарая. Бу хакта Россия Гадәттән тыш хәлләр министрлыгының рәсми кушымтасында хәбәр иттеләр.

Яңа ел бәйрәмнәрендә, 31 декабрьдән 11 гыйнварга кадәр, Татарстанда ашыгыч медицина ярдәме эше көчәйтеләчәк, травматология пунктлары һәм дежур хезмәтләр эшләячәк. Моннан тыш, стационарларда тәүлек әйләнәсе махсуслаштырылган медицина ярдәме күрсәтү оештырылачак.

Татарстанның Тукай районындагы Яңа бистәсенә газ кертү эшләре төгәлләнде. Бу хакта Татарстан Республикасы Сәнәгать һәм сәүдә министрлыгы хәбәр итә.

Дәүләт Советы Рәисе Фәрит Мөхәммәтшин Казанда яшәүче Вафиннар гаиләсендә тәрбияләнүче балаларның Яңа ел теләкләрен чынга ашырды. Бу хакта ТР Дәүләт Советы матбугат хезмәте хәбәр итә.

«СалаваТік» балалар проекты интернетта «Әлли-бәлли, нәни чыршы» җырына видеоролик премьерасын тәкъдим итте. Композиция Зөләйха Камалова шигырьләренә һәм Таңсылу Мостафина музыкасына иҗат ителгән.

Татарстанда халык өчен газ бәясен үзгәртү турындагы карар проекты әзерләнде. Документ хәзерге вакытта коррупциягә каршы экспертиза процедурасын уза. Проект тексты нигезендә, 1 гыйнвардан газның бер кубометры бәясе 8,55 сум тәшкил итәчәк. Бәяне икенче тапкыр арттыру 1 октябрьгә планлаштырылган, ул вакытта тариф 9,28 сумга кадәр артачак.

Буада яшәүче җиденче сыйныф укучысы Елизавета Нестерованың Яңа ел хыялы чынга ашты. Кызга Татарстан Рәисе Рөстәм Миңнеханов исеменнән тапшырылган бүләкне Буа муниципаль районы башлыгы Ранис Камартдинов алып килеп биргән. Ул кызның гаиләсе янына Кыш Бабай һәм Кар Кызы белән бергә килгән.

5-9 гыйнварда Казанда «Идел очрашулары» фестивале узачак. Ул быел 36 еллыгын билгеләп үтә. Татарстан башкаласына Россиянең 27 төбәгеннән, шулай ук Белоруссиядән һәм Казахстаннан 300дән артык яшь журналист, кинематографист, мультипликатор һәм фотограф киләчәк.

Кыш бабайның Россия буйлап Яңа ел сәяхәтен интерактив карта ярдәмендә онлайн режимда күзәтергә мөмкин булачак. Карта Росавиация платформасында булдырылган. Бу хакта ТАСС хәбәр итә.

Татарстан Республикасында кискен респиратор вируслы инфекцияләр һәм грипп белән авыручылар саны арту дәвам итә. Кулланучы хокукларын яклау һәм кеше иминлеге өлкәсендә күзәтчелек федераль хезмәте (Роспотребнадзор) мәгълүматлары нигезендә, 2025 елның 22-28 декабрендә ОРВИ һәм грипп белән авыруның 27 352 яңа очрагы теркәлгән. Бу эпидемия бусагасыннан 24,5 процентка югарырак.

«Миллиард.Татар» «Топ татар – 2025» рейтингының үз версиясен тәкъдим итте. Анда төрле илләрдән 190 татар кергән. Исемлектә татар телен, тарихын һәм милли үзаңны саклау һәм үстерүгә зур өлеш керткән фән, мәдәният, мәгариф, бизнес һәм җәмәгать эшлеклеләре урын алган.

Россия халкы Яңа ел бәйрәмнәреннән соң йорт ишегалларында һәм башка җәмәгать урыннарында чүп калдырган өчен штрафка тартыла ала. Бу хакта коммуналь хуҗалык өлкәсендә эксперт һәм җәмәгать эшлеклесе Дмитрий Бондар хәбәр итте.

31 декабрьдә Чаллының Азатлык мәйданында бәйрәм салюты булачак. Фейерверк 22:00 сәгатьтә башланачак.

РФ Фәннәр академиясе академигы Геннадий Онищенко гражданнарга Яңа ел бәйрәмнәрен озайтмаска һәм 2 гыйнвардан эшкә керешергә киңәш итә. Аның сүзләрен «РИА Новости» китерә.

2025 ел йомгаклары буенча Татарстанда 476 меңнән артык кеше үз-үзенә кредит алуны тыйган. Республикада яшәүчеләр мондый чикләү кертүгә 554,7 меңнән артык гариза, ә аны гамәлдән чыгару өчен 46,8 мең гариза тапшырган. Бу мәгълүматлар Берләштерелгән кредит бюросы статистикасыннан күренә.

Россия гражданнары 2026 елның 1 гыйнварыннан паспортка үз теләкләре буенча алты төрле билге кертү мөмкинлегенә ия булачак. Төп үзгәреш салым идентификациясенә кагыла: ИНН урынына (бу норма 2025 ел ахырына кадәр гамәлдә) документка халык турында мәгълүматның бердәм федераль мәгълүмати регистрыннан язма номерны кертеп булачак. Бу хакта «ТАСС» хәбәр итә.

Россия Президенты Владимир Путин Казанда яңа судьялар, шулай ук судлардагы ике рәис урынбасарын билгеләү турындагы указга кул куйды. Тиешле документ хокукый актларны рәсми бастыру порталында урнаштырылган.

Россиядә тюбинг таучыклары һәм аларда кулланыла торган «ватрушкалар» параметрларын көйләүче яңа илкүләм стандарт (ГОСТ) кабул ителде. Документның нечкәлекләре турында Дәүләт Думасының Гаиләне яклау комитеты рәисенең беренче урынбасары Татьяна Буцкая сөйләде, дип хәбәр итә ТАСС.

Россиядә транспорт чаралары дәүләт реестрыннан белешмә алу шартлары 2026 елның 1 гыйнварыннан үзгәрәчәк. Кайбер төр белешмәләр өчен түләү кертелә, әмма онлайн-режимда бирелә торган мәгълүматның төп өлеше элеккечә бушлай калачак. Бу хакта «Fit Service» челтәре юристы Екатерина Лазарева хәбәр итте, дип яза «РИА Новости».

Азатлык укучылары Фәттаховны "Ел шәхесе" булып 2017 елда да сайлаганнар иде. Әмма ул чакта ул бөтенләй башка шартларда иде. Хәзер исә Татарстанның элекке мәгариф министры сак астында.

Чтобы восстановить режим после новогодней ночи, 1-го января нужно встать в обычное для себя время. Об этом «Татар-информу» рассказала врач-сомнолог и невролог Елена Царева.

Яңа ел төненнән соң режимны көйләү өчен, 1 гыйнварда үзең өчен гадәти вакытта торырга кирәк. Бу хакта «Татар-информ»га табиб-сомнолог һәм невролог Елена Царева сөйләде.

Дәүләт Думасының гаиләне яклау комитеты башлыгы Нина Останина хөкүмәткә балаларга бердәм пособие алу шартларын йомшартучы закон проектын юллаган. Инициатива авторы кереме яшәү минимумыннан артыграк булган (әмма 20 проценттан да күбрәккә артмаган) гаиләләргә дә пособие түләргә тәкъдим итә, дип хәбәр итте РИА Новости.

Татарстанда яңа 2026 елның беренче көнендә буранлы һәм көчле җилле тотрыксыз һава торышы тыныч һәм салкын һава торышы белән алмашачак. Бу ТР Гидрометеорология үзәге фаразыннан билгеле булды.

Татарстанда яшәүче кайбер гражданнар дәүләт хисабына шифаханә-курорт дәвалануы уза ала. Бушлай юллама алу хокукына кемнәр ия булуы турында – «Татар-информ» материалында.