Владимир Путин «Газпром» башлыгына Хезмәт герое исемен бирде

(Казан, 20 ноябрь, «Татар-информ»). «Газпром» башлыгы Алексей Миллерга Хезмәт герое исеме бирелде.

Россия Президенты Владимир Путин шул хактагы карарны имзалаган.

«Дәүләт һәм халык алдындагы хезмәт казанышлары өчен „Газпром“ ГАҖ директорлар советы рәисе урынбасары, идарә рәисе Миллер Алексей Борисовичка Россия Федерациясе Хезмәт Герое исемен бирергә», диелә хокукый мәгълүматның рәсми порталындагы документта.

Россия Президенты Владимир Путин Татарстанның Дәүләт Киңәшчесе Минтимер Шәймиевкә Изге апостол Андрей Первозванный орденын бирде, дип язган идек.