Казан укучысының танк проекты «Россиянең илкүләм байлыгы» бәйгесендә җиңде
Казаннан 15 яшьлек мәктәп укучысы Ибраһим Әхмәдуллин «Технологияләр, техник иҗат» юнәлешендә «Россиянең илкүләм байлыгы» XVIII Бөтенроссия талантлы яшьләрнең казанышлары бәйгесендә җиңү яулады.
Үсмерне диплом һәм «Илкүләм казаныш» көмеш күкрәк билгесе белән бүләкләделәр.
Фото: © Айрат Ибраһимов
Ибраһим робототехника белән дүрт яшеннән шөгыльләнә. Ул бу шөгыль белән аларның гаиләсе Нижневартовскида яшәгәндә үк мавыга башлаган. Сүз уңаеннан, Әхмәдуллиннар – күп балалы ата-ана, алар ике малай һәм өч кыз тәрбияли. Берничә ел элек Казанга күченгәннәр.
Ибраһим танк проектын бер ел элек әзерләгән. Ул барлык детальләрне дә җентекләп уйлап эшләгән, моңа бер елга якын вакыт киткән. Моның өчен үсмер танклар төзүне, шул исәптән чит ил һәм Россия хәрби машиналарының төзелешен җентекләп өйрәнгән.
Фото: © Айрат Ибраһимов
«KF51 һәм «Абрамс Икс» танклары һөҗүмгә күчкәч, безнең «Армата»ның проблемалары туачак, чөнки әлеге танк яңа сугыш тактикасы барлыкка килгәнче эшләнгән. Әлеге модель никадәр генә яхшы булмасын, ул KF51 һәм «Абрамс Икс»тан калышачак, чөнки алар заманча шартларга җайлаштырылган. Мин танк моделен боларның барысын да исәпкә алып әзерләдем. Шул ук вакытта, аны чит ил элементларын кулланмыйча гына җыярга мөмкин. Төзәгечләр, барлык электроника, күзәтү приборлары, идарә итү органнары – боларның барысы да бездә бар. Мин танкны аны җыю өчен бернинди дә яңа әйбер таләп ителмәслек итеп ясадым», - диде Ибраһим Әхмәдуллин.
Фото: © Айрат Ибраһимов
Хәзерге вакытта Ибраһим үз проектына патент әзерли һәм тиздән танкны махсус хәрби операция зонасында күреп булачагына өметләнә.