Чиләбе өлкәсе татарлары конгрессы балаларны «Йолдызлык» этнолагерена чакыра
Чиләбе өлкәсе татарлары конгрессы Кунашак муниципаль районы хакимиятенең Мәгариф идарәсе белән берлектә балаларны «Йолдызлык» милли лагерена чакыра. Бу хакта Бөтендөнья татар конгрессының матбугат хезмәте хәбәр итә.
Сменаның программасына тарих, тел, вокал, халык биюе, гамәли сәнгать (һ.б.) буенча дәресләр кергән. Ул мавыктыргыч уеннар, бәйгеләр һәм нигезен татар халкының милли үзенчәлеге тәшкил иткән башка күп кенә чаралар белән баетылган.
Смена Чиләбе өлкәсенең Кунашак районында Чибәркүл буенда ураншкан Г.И.Баймурзин исемендәге балалар сәламәтләндерү лагеренда оештырыла, диелә хәбәрдә.