Буа районында су күтәрелү сәбәпле Зөя аша ике күперне яптылар

Татарстанның Буа районында Зөя елгасында су ташу һәм суның биеклеге күтәрелү сәбәпле ике түбән күпер ябылган. Бу хакта ТР Транспорт министрлыгы матбугат хезмәте хәбәр итә.

Аларның берсе Вольный Стан – Кыят – Яшевка автомобиль юлында урнашкан.

«Урап узу юл хәрәкәтен оештыру схемасы нигезендә гомуми файдаланудагы автомобиль юлларының гамәлдәге челтәре буйлап башкарылачак», - дип өстәделәр министрлыкта.

Моннан тыш, төбәк әһәмиятендәге «Казан – Ульяновск» – Черки-Килдураз автомобиль юлындагы күпер аша хәрәкәт вакытлыча чикләнгән.

Чикләүләр язгы ташу төгәлләнгәнче гамәлдә булачак.