Физкультурачылар көнендә Урам паркында контракт буенча хезмәткә сайлап алу пункты ачылды
Бүген Казанда Физкультурачылар көнендә контракт буенча хезмәткә сайлап алу мобиль пункты ачылды. Палатка Миллениум күпере астында «Урам» экстрим-паркы янында урнашкан.
«Монда һәр кеше контракт буенча хәрби хезмәтнең нәрсә икәнен белә, консультация ала һәм сайлап алуның беренчел этапларын уза ала. Бала да, олы кеше дә Калашников автоматын җыя-сүтә һәм үзен тирда сынап карый ала. Һәрнәрсәдә безнең инструкторлар ярдәм итәчәк», - дип сөйләде Казанда контракт буенча хәрби хезмәткә сайлап алу пункты офицеры Егор Горячев.
Офицер билгеләп үткәнчә, пункт эшенең яңа юнәлешләренең берсе - пилотсыз очкычлар операторлары җыю. БПЛА бүлекчәсенә ихтыяҗ зур һәм яшь кешеләр арасында кызыксыну да бар.
«Безгә компьютер уеннары уйнаучы, чыдамлы һәм техниканы яхшы белүче яшь белгечләр кирәк», - диде Егор Горячев.
Бүген мобиль пунктка йөздән артык кеше килгән. Килүчеләрне Калашников автоматын җыю-сүтү, магазинга патроннар тутыру һәм «Рубеж-1» электрон тирында ату аеруча кызыксындырган.
«Монда безнең белән Африка корпусы вәкилләре эшли. Аерым билгеләп үтәсе килә, РФ Саклану министрлыгы белән контракт төзергә теләүчеләргә түләүләр артты», - дип өстәде Егор Горячев.
Элегрәк Татарстан Рәисе Рөстәм Миңнеханов РФ Саклану министрлыгы белән контракт төзергә теләүчеләргә бер тапкыр бирелә торган түләүне арттыру турында карар кабул иткән иде. Хәзер ул 3,1 миллион сум тәшкил итәчәк – бу илдә иң югары түләүләрнең берсе. Түләү ике өлештән тора: 2,7 млн сум – республикадан, 400 мең сум – Саклану министрлыгыннан.