Миронов 14 көндә кире тапшырган авиабилетларның тулы бәясен кайтарырга тәкъдим итте

Дәүләт Думасы депутаты Сергей Миронов һәм Дәүләт Думасының гражданлык җәмгыятен үстерү комитеты башлыгы Яна Лантратова Россия транспорт министры Андрей Никитинга мөрәҗәгать юллаган. Мөрәҗәгатьтә пассажирларга сатып алганнан соң 14 көн эчендә кире тапшырган авиабилетларның тулы бәясен кайтару хокукын беркетергә тәкъдим ителә. Бу хакта РИА Новости хәбәр итә.

Мөрәҗәгатьтә ассызыкланганча, әлеге мөмкинлек, нинди тариф сайланган булуга карамастан, барлык категориядәге билетларга кагылырга тиеш. Аерым очраклар өчен генә искәрмә ясарга тәкъдим ителә. Мәсәлән, промотариф буенча махсус шартлар нигезендә сатып алынган билетлар өчен.

Миронов билгеләп үткәнчә, инициатива билетларны кире кайтарган очракта авиакомпанияләр шактый зур суммалар тотып калу практикасы киң таралган булу белән бәйле. Аның сүзләренчә, Кулланучы хокукларын яклау һәм кеше иминлеге өлкәсендә күзәтчелек федераль хезмәте (Роспотребнадзор) ел саен пассажирлар йөртүче компанияләргә карата меңләгән шикаять кабул итә. Гражданнарның бу өлкәдә югалткан акчаларының гомуми суммасы берничә миллиард сум тәшкил итә.

Соңгы айларда, аэропортларның эшендә өзеклекләр булу сәбәпле, проблема аеруча еш очрый башлады, дип өстәде сәясәтче. Пассажирлар башка рейслардан яисә альтернатив транспорттан файдалану өчен билетларын кире тапшырырга мәҗбүр. Мондый очракларда акчалар кыска вакыт дәвамында – 1-2 көндә кайтарылырга тиеш, дип ассызыклады Миронов.