Топилин: Кешегә дәүләт сатып алулары урынына товарны үзенә сайлау мөмкинлеген бирү кирәк
Дәүләт сатып алулары өлкәсендә гамәлдәге кануннарны шактый камил дип санарга була, әмма шулай да аңа даими рәвештә үзгәрешләр һәм төзәтмәләр кертелә. Дәүләт Думасының икътисади сәясәт комитеты рәисе Максим Топилин Казанда Бөтенроссия сатып алулар өлкәсендәге белем бирү оешмаларының беренче конференциясендә шулай дип белдерде. Бу хакта ТР Сатып алулар буенча дәүләт комитеты матбугат хезмәте хәбәр итә.
Чара 27 төбәктән килгән вәкилләрне берләштерде, алар арасында сатып алулар өлкәсендә әйдәп баручы экспертлар, федераль хакимият органнары вәкилләре һәм илнең югары уку йортлары мөгаллимнәре бар. Ачылу тантанасы Татарстан Республикасы Премьер-министрының беренче урынбасары Рөстәм Нигъмәтуллин катнашында узды. Топилин билгеләп үткәнчә, федераль дәрәҗәдә дә, төбәк дәрәҗәсендә дә шактый күләмдәге бюджет акчаларының максатчан кулланылышы һәм нәтиҗәлелеге нәкъ менә законны гамәлгә ашыруга бәйле.
Топилин шулай ук Россия Президенты Владимир Путинның Көнчыгыш икътисади форумындагы чыгышына сылтама ясады, анда дәүләт башлыгы цифрлы карарларга күчү һәм маркетплейслар аша 44нче закон нигезләмәләрен гамәлгә ашыру кирәклеге турында белдерде. Депутат искәрткәнчә, якын киләчәктә нәкъ менә шул юнәлешкә игътибар биреләчәк.