Казанлыларны корея телен өйрәнү буенча мастер-класска чакыралар
Бүген «Черек күл» паркында корея телен өйрәнү буенча мастер-класс үтә. Дәресне Казан федераль университеты остазы Ольга Перхачева алып бара.
Чарага килүчеләр алфавит белән танышып, телдәге төп грамматик күренешләрне, танышу өчен кирәкле сүзләрне өйрәнәчәк. Шәһәр халкы укытучы белән бергә телне өйрәнүдәге җиңел ысуллар һәм кыенлыклар хакында фикер алышачак, шулай ук Корея мәдәниятенә кагылышлы квиз үткәрү дә күздә тотыла.
Теләге булганнарга мастер-класста катнашу өчен теркәлергә кирәк.
Очрашу паркның амфитеатрында оештырыла. Чара сәгать 17:30 да башлана, дип хәбәр итә Татарстан башкаласының парклар һәм скверлар дирекциясе.