Цимлянский: Хәрби хезмәткә чакырылучылар Россия территориясендә генә хезмәт итәчәк
2025 елның көзге чакырылыш хәрби хезмәткә чакырылучылар бары тик Россия Федерациясе территориясендә генә хезмәт итәчәк. Бу хакта РФ Кораллы көчләр Генераль штабының Баш оештыру-мобилизация идарәсе башлыгы урынбасары, вице-адмирал Владимир Цимлянский әйтте. ТАСС шул хакта хәбәр итә.
«Барлык хәрби хезмәткә чакырылучылар хәрби хезмәтне үтү өчен Россия Федерациясе территориясендә генә берләшмәләрнең һәм хәрби частьләрнең даими дислокация пунктларына җибәреләчәк», – диде ул язгы чакырылыш йомгаклары буенча һәм көзге кампания алдыннан оештырылган брифингта.
Цимлянский сүзләренчә, яңа хәрбиләрнең өчтән бере укыту берләшмәләренә һәм хәрби частьләргә бүленәчәк, анда алар заманча техниканы үзләштерәчәк һәм хәрби-хисап белгечлеге алачак, шуннан соң гаскәрләргә җибәреләчәк. Гамәли мәсьәләләрне хәл итү өчен фәнни роталар формалаштыру практикасы да дәвам итәчәк.
«Производствога алдынгы идеяләрне һәм алга киткән технологияләрне кертүче фәнни-җитештерү подразделениеләре, шулай ук иң перспективалы спортчыларны әзерләү өчен тиешле шартлар тудырылган спорт роталарын туплауны игътибарсыз калдырмаячакбыз», – дип ассызыклады вице-адмирал.
Ул кандидатларга таләпләр һәм хезмәт узу шартлары турында тулырак мәгълүмат Саклану министрлыгының рәсми порталында бар, дип өстәде.