Рөстәм Миңнеханов Татарстан дәүләт хезмәте ветераннары белән очрашты

Татарстан Рәисе Рөстәм Миңнеханов республика дәүләт хезмәте ветераннары белән очрашты. Халыкара өлкәннәр көненә багышланган тантаналы чара Казан Ратушасында узды. Бу хакта ТР Рәисенең матбугат хезмәте хәбәр итә.

Ветераннарны сәламләп, республика лидеры аларның хезмәтләре белән республика үсешенә зур өлеш кертүләрен ассызыклады. Ул ассызыклаганча, соңгы 5 ел Татарстан өчен җиңел булмады, әмма республика пандемия, санкцион басым һәм икътисади мөнәсәбәтләрне үзгәртү шартларында тотрыклылыгын саклап калды.

Фото: © ТР Рәисенең матбугат хезмәте

«Бүген Татарстан - илебезнең терәк төбәге. Көчле икътисад, социаль тотрыклылык, уңайлы мохит, милләтара һәм конфессияара татулык», – дип белдерде Миңнеханов.

Республика җитәкчесе искәрткәнчә, махсус хәрби операциядә катнашучыларга һәм аларның гаилә әгъзаларына ярдәм итү буенча Татарстанда тулы бер чаралар комплексы гамәлгә ашырыла. Шулай ук шефлыктагы Лисичанск һәм Рубежное шәһәрләренә дә зур ярдәм күрсәтелә.

Фото: © ТР Рәисенең матбугат хезмәте

«Хөрмәтле ветераннар! Сез югары профессионализм һәм эшкә тугрылык эстафетасын тапшырдыгыз. Киләчәктә дә яшьләр белән тәҗрибә уртаклашуыгызны һәм иҗтимагый проектларда актив катнашуыгызны сорыйм. Сезнең зирәклегегез бүген, без бергә илнең һәм Татарстанның яңа киләчәген формалаштырганда аеруча кирәк», - дип өстәде Рөстәм Миңнеханов.

Татарстан Рәисе аларга ныклы сәламәтлек, озын гомер, якыннарының җылысын һәм кайгыртуын теләде һәм дәүләт бүләкләре тапшырды.