Уфада курай көненә багышланган күргәзмә ачыла

Уфада курай көненә багышланган «Курай — башкорт халкының җаны» күргәзмәсе ачыла. Исегезгә төшерәбез, быел беренче тапкыр Башкортстанда Курай көне билгеләп үтелә. Бу хакта «Башинформ» хәбәр итә.

Курай көне Башкортстан башлыгы Радий Хәбиров тарафыннан гамәлгә куелды һәм беренче тапкыр 10 октябрьдә билгеләп үтеләчәк, диелә хәбәрдә.

9 октябрьдән 5 ноябрьгә кадәр эшләячәк Башкортстан Республикасы Милли музеендагы күргәзмәдә курайның эволюциясен күрергә була. Монда курайның халык музыка коралыннан академик өйрәнү предметына кадәр үзгәрүен күрсәтүче сирәк китаплар, нота басмалары һәм архив фотосурәтләр булачак.

Шулай ук экспозициягә башкорт музыка сәнгатенең легендаларына караган шәхси инструментлар – курайлар да кергән. Күргәзмә экспонатларының берсе – дөньякүләм танылган AY YOLA төркеме солисты Ринат Рамазановның шәхси курае. Килүчеләр уникаль инструментларны гына түгел, сәхнә костюмнарын да күрәчәк.

Оештыручылар күргәзмәне ачуны курай көненә туры китерде. Күргәзмә ачылышында кунаклар курай тавышын ишетә, концертлардан өзекләр карый алачак.