Актаныш мәктәбендә ярминкәдә хәрбиләр өчен 132 мең сум акча җыелган

Актанышның 2нче урта мәктәбендә ел саен «Без бергә» хәйрия ярминкәсе узды. Бу күркәм традиция өченче мәртәбә укучыларны, укытучыларны һәм ата-аналарны берләштерә.

Ярминкә яңа рекорд куйды. Әгәр узган ел махсус хәрби операциядә катнашучы якташларына ярдәмгә 81 мең сум акча җыя алсалар, быел сумма 132 мең сумга кадәр арткан.

Мәктәп ишегалды бу көнне балалар тавышы һәм бәйрәм рухы белән тулды. Һәр сыйныфның вәкилләре җыелган ярминкә өстәлләрендә өйдә пешерелгән камыр ризыклары, хуш исле тәм-томнар һәм кулдан эшләнгән төрле-төрле әйберләр бик күп иде.

Әмма бу игелек бәйрәмендә иң мөһим максат махсус хәрби операциядә катнашучыларга ярдәм итү. Мондый акцияләр тыйнак уза, әмма көн саен безнең тыныч күкне саклаучыларга әһәмиятле ярдәм.

Оештыручылар барлык катнашучыларга – укучыларга, ата-аналарга, укытучыларга һәм тәрбиячеләргә бәяләп бетергесез өлешләре өчен рәхмәт белдерәләр.

Элегрәк ТР Рәисе Рөстәм Миңнеханов Татарстан Дәүләт Советына еллык Юлламасында махсус хәрби операциядә катнашучыларга ярдәм күрсәтүгә мөһим өлеш керткән өчен волонтерларга рәхмәт белдерде. «Кешеләр моны үз тирәсендә шундый ук битараф булмаган гражданнарны берләштереп, фикердәшләрдән тулы бер командалар җыеп ихлас күңелдән һәм чын йөрәктән эшли», - дип искәртте республика җитәкчесе.

Соңрак Татарстан Рәисе Рөстәм Миңнеханов Мәскәү Кремлендә Россия Президенты Владимир Путин белән очрашуда махсус хәрби операциядә катнашучыларга ярдәм итү турында сөйләде. «Гуманитар ярдәм буенча зур эш алып барыла. Һәр шәһәргә, һәр муниципалитетка барабыз, эшлибез. Халык һәм компанияләр ярдәм җыю буенча актив эшли. 4389 тонна ярдәм җыеп җибәрелде», - дип билгеләп үтте ул.

Материал Ләйсән Газизова ярдәмендә әзерләнде.