Татарстанда иң күп балалы гаилә 12 бала тәрбияли

Татарстанда иң күп балалы гаилә республиканың Әлмәт районында яши. ТР Хезмәт, халыкны эш белән тәэмин итү һәм социаль яклау министрлыгы матбугат хезмәтендә «Татар-информ» агентлыгына шул хакта хәбәр иттеләр.

Әлмәт районы матбугат хезмәтендә ачыклык кертүләренчә, биредә 12 балалы (биш малай һәм җиде кыз) Федоровлар гаиләсе турында сүз бара.

«Бу гаиләдә иң өлкән бала – 2004, ә иң кечесе 2025 елгы», - дип билгеләп үттеләр ведомствода.

Бүгенге көндә Федоровларның олы кызы инде кияүгә чыккан һәм үз гаиләсе белән яши, тагын бер улы - университетта, өченчесе көллияттә укый. Күп балалы гаиләнең биш баласы мәктәптә укый. Калганнары өйдә белем ала.

Балаларның әти-әнисе - Ирина һәм Денис Федоровлар 22 ел бергә гомер итә. Бүгенге көндә алар Колшәрип авылында үз йортлары белән яши.

Элегрәк ТР Рәисе Рөстәм Миңнеханов указы нигезендә Ирина Федорова «Ата-ана батырлыгы» медале белән бүләкләнгән иде. Күп балалы гаиләләргә ярдәм итү «Гаилә» илкүләм проекты максатларына туры килә.