Максим Топилин: Укытучы булу - зур хезмәт

Дәүләт Думасының Икътисади сәясәт комитеты рәисе, Татарстаннан Дәүләт Думасы депутаты Максим Топилин Чүпрәле муниципаль районы укытучылары белән очрашты. Бу хакта депутатның матбугат хезмәте хәбәр итә.

Ул педагогларны һөнәри бәйрәмнәре белән котлады. «Мәктәп белән ничек кенә булмасын без гомер буе хезмәттәшлек итәбез: башта үзебез укыйбыз, аннары балаларыбыз, оныкларыбыз. Педагогның әһәмиятен бәяләп бетерерлек түгел. Укытучылар ярдәме белән без игелеклелек, сабырлык һәм үҗәтлек кебек мөһим тормыш дәресләре алабыз», — дип билгеләп үтте депутат.

Ул шулай ук укытучы булуның зур хезмәт булуын ассызыклады. «Нәкъ менә укытучыларыбызның тырышлыгы һәм фидакарьлеге нәтиҗәсендә Россия мәгарифе дөньяда иң яхшыларның берсе булып тора! Моны халыкара олимпиадалар нәтиҗәләре дә, безнең галимнәрнең эшләре дә исбатлый! Тармакның барлык хезмәткәрләренә ныклы сәламәтлек һәм яхшы кәеф! Сизгерлегегез, зирәклегегез һәм балаларга ышанычыгыз өчен рәхмәт!» - диде ул.

Максим Топилин Чүпрәле муниципаль районына визиты барышында өч дәрәҗә Дан ордены кавалеры Арсланов Зиатдин Миндубай улы исемендәге Кече Чынлы урта гомуми белем бирү мәктәбендә үткәрелгән капиталь ремонт нәтиҗәләре белән танышты, шулай ук «Авиация пилотсыз системаларын эксплуатацияләү» белгечлеге буенча белем алучы тармак технологияләре техникумы студентлары белән очрашты. Студентлар БПЛА төзелешен, идарә итәргә, аларга хезмәт күрсәтергә өйрәнә, ә тагын осталыкларын практикада актив камилләштерәләр.

«Һөнәргә, чыннан да, ихтыяҗ зур: мондый белгечләр авыл хуҗалыгында да, төзелештә дә, башка бик күп тармакларда да кирәк», - дип билгеләп үтте Максим Топилин.