Татарстан милли ат традицияләре үзәгенә татар токымлы айгыр тапшырды
Татарстан Мәскәүдәге милли ат традицияләре үзәгенә татар токымлы айгыр тапшырды. Элегрәк Теләче районының С.Ш. Гыйниятуллин исемендәге нәсел репродукторы айгыры Байкал Сабантуйларда шәһәр һәм район ат чабышларында чыгыш ясаган, дип хәбәр итә Татарстан Республикасы Авыл хуҗалыгы һәм азык-төлек министрлыгы матбугат хезмәте.
«Татар токымлы айгыр Халык хуҗалыгы казанышлары күргәзмәсендә (ВДНХ) Кремль атта йөрү мәктәбенең демонстрацияле ат абзарында һәм ат театрында күрсәтеләчәк. Абзарда милли токымлы атлар тотыла. Атка көндәлек күнегүләр, трюклар һәм төрле командалар өйрәтеләчәк», - дип билгеләделәр министрлыкта.
Милли ат традицияләре үзәгендә Россиянең мәдәни мирасын һәм ат казанышларын күрсәтү һәм саклау өчен спорт, ял итү-күңел ачу, мәгариф һәм тармак чаралары үткәрелә.