Педиатр: Аномаль салкыннарда балаларның сәламәтлегенә аеруча игътибарлы булырга кирәк

Көчле салкыннарда ата-аналарга балаларының сәламәтлегенә аеруча игътибарлы булырга кирәк. Баланы ничек итеп дөрес киендерергә һәм салкын һавада йөрергә мөмкинме икәнлеге турында «Ники Детства» шифаханә бүлеге мөдире Мәдинәт Сепиханова «Радио 1»гә биргән интервьюсында сөйләде.

Табиб сүзләренчә, туңудан саклануның төп кагыйдәсе – күп катлы кием. Беренче катлам тәннән дымны читкә чыгарырга тиеш, икенчесе – җылыны сакларга, ә өченчесе җилдән һәм кардан сакларга тиеш.

Белгеч кысан кием һәм аяк киеме балага зыян китерергә мөмкин, чөнки кан әйләнешен начарайта һәм өшү куркынычын арттыра, дип кисәтте. Салкын көннәрдә урамда йөрү вакытын да чикләү мөһим.

Ике–өч яшьлек балаларга урамда 30-40 минуттан да артык булмаска киңәш ителә. Әгәр бала туңа башласа, йөрүне 10-15 минутка кадәр кыскарту яхшырак. Җиде яшьтән өлкәнрәк балаларга актив хәрәкәт вакытында сәгать ярымга кадәр йөрергә мөмкин, әмма бу вакытны ике тапкырга бүләргә кирәк. Өч айга кадәрге сабыйларны -20 градустан түбән температурада урамга алып чыкмавың хәерле.

Моннан тыш, табиб урамга чыгарга 20-30 минут кала тиренең ачык урыннарына саклагыч крем сөртергә киңәш итә. Баланың муены, колаклары һәм куллары ябык, ә киемнәре коры булуын күзәтергә кирәк.

«Әгәр термометр баганасы -25 тән түбән төшсә, озак йөрүдән баш тарту яки бик кыска вакытка гына чыгып керү куркынычсызрак», - дип билгеләде Сепиханова.