Казан имамы исламда иң яхшы исемнәр турында сөйләде

Казанның «Гаилә» мәчете имамы Рөстәм Хәйруллин «Татар-информ»га биргән интервьюсында Ислам динендә нинди исемнәр иң яхшысы дип саналуы турында сөйләде.

«Безнең яраткан Пәйгамбәребез с.г.в. әйткәнчә, без малайларга бирә алган иң яхшы исемнәр – Габдулла һәм Габдерәхман. Аннан соң пәйгамбәрләрнең исемнәре килә: әйтик, Мөхәммәд, Әхмәд, Якуб, Йосыф», – диде Хәйруллин.

Ул шулай ук балага исем таба алмаган мөселманнарга ата-бабаларының исемнәренә игътибар итәргә киңәш итә.

«Сез балага нинди исем кушарга икәнен белмәгәндә, гаилә агачын алыгыз да элеккеге бабаларыгызның исемнәренә игътибар итегез. Алар һәрвакыт чын татар исемнәрен йөрткәннәр», - дип өстәде хәзрәт.