Узган ел Татарстан тикшерүчеләре коррупция турында 900дән артык эш кузгаткан
2025 елда Татарстан тикшерүчеләре коррупция турында 947 җинаять эше кузгаткан, бу 2024 ел күрсәткеченнән артып китә (890 эш). Россия Тикшерү комитетының ТР буенча идарәсе коллегиясе утырышында шулай дип белдерделәр.
Фото: Россия Тикшерү комитетының ТР буенча идарәсе
Судка тапшырылган коррупция эшләре саны сизелерлек арткан. Түрәләргә һәм махсус статуска ия башка затларга карата коррупциянең 56 эпизоды булган 19 җинаять эше җибәрелгән. 2025 елда 447 гаепләнүче суд каршына баскан, бу үткән ел белән чагыштырганда 26 процентка күбрәк.
Тәмамланган эшләр буенча килгән зыян 15 миллиард сумнан артып киткән, бу сумманың дүрттән өч өлеше диярлек кире кайтарылган. Моннан тыш, гаепләнүчеләрнең 7 миллиард сумлык милке һәм акчаларына арест салынган.
Узган ел Татарстан тикшерүчеләре барлыгы 4509 җинаятьне тикшергән (2024 елда – 4323), шуларның яртысыннан артыгы – авыр һәм аеруча авыр җинаятьләр.