Казанда коткаручылар биеклектән егылып имгәнгән ир-атны түбәдән алып төшкән
Казанда коткаручылар биеклектән егылып төшеп имгәнгән ир-атны түбәдән төшергән. «Татар-информ»га Россия Гадәттән тыш хәлләр министрлыгының ТР буенча баш идарәсендә хәбәр итүләренчә, Россия Гадәттән тыш хәлләр министрлыгының эзләү‑коткару отряды хезмәткәрләре Ершов урамы, 78б адресына килгән, анда бер катлы янкорманың түбәсендә имгәнгән 53 яшьлек ир-ат яткан.
Якынча мәгълүматларга караганда, ир-ат биеклектән егылып төшкән һәм имгәнгән.
Коткаручылар аның янына өч аяклы баскыч ярдәмендә менгән. Ир-атны каты носилкага салып ныгытып бәйләп куйганнар һәм альпинист инструментлары ярдәмендә әкрең генә җиргә төшергәннәр. Зыян күрүчене ашыгыч ярдәм бригадасына тапшырганнар.