Рифкать Миңнеханов генетик фәнни тикшеренүләр программасын булдыру кирәклеген әйтте

Татарстанның Фәннәр академиясе президенты Рифкать Миңнеханов әйтүенчә, терлекчелектә генетика буенча Агробиотехнопаркның үсеш картасын һәм генетик фәнни тикшеренүләр программасын булдыру зарур. Бу хакта ул ТР Авыл хуҗалыгы һәм азык-төлек министрлыгының коллегия утырышында сөйләде.

Ул Агробиотехнопаркның Россия өчен уникаль проект икәнлеген, аңа тиңнәр булмавын ассызыклады. Рифкать Миңнеханов әйтүенчә, хәзерге вакытта фәнни-техник корпус төзелеше бара, августта үзәкнең ачылышы көтелә.

Фәннәр академиясе президенты Агробиотехнопаркның «Азык-төлек куркынычсызлыгының технологик тәэминаты» илкүләм проекты буенча төзелүен искәртте. «Министрлыкның актив позициясе нәтиҗәсендә бу проект буенча бик яхшы эш башкардык. Матди-техник база үсешенә һәм тикшеренүләргә дип республика өчен 5,7 млрд сумнан артык акча каралган, шуның 2 млрд сумга якыны 2025 елда кулланышка кертелгән. Темпларны киметмичә бирелгән акчаларның нәтиҗәле файдаланылуына ирешергә кирәк», – ди Рифкать Миңнеханов.