Муса Җәлил турнирында иң матур алым күрсәткән көрәшчегә махсус премия тапшырылды

«Ватаным Татарстан» газетасы гамәлгә куйган, Муса Җәлил истәлегенә уздырылган көрәш турнирында Ильяс Галимов исемендәге махсус премия дә тапшырылды. Әлеге бүләк турнирның финал алышларында иң матур алым күрсәткән көрәшчегә бирелә. Быел 30 мең сум күләмендәге премиягә 90 кг авырлык үлчәвендә җиңүче булган Чаллы көрәшчесе Азат Габдрәшитов лаек булды.

. Әлеге премия 2020 елда вафат булган танылган көрәшче Ильяс Галимов истәлегенә бирелә. 2021 елда бүләкне Кукмарадан Илсур Гыймадетдиновка, 2022 елда Әлмәттән Рамил Синәкәевкә, 2023 елда Чистайдан Илнар Закировка, 2024 елда Чаллы көрәшчесе Ранис Гыйләҗетдиновка тапшырдылар.