Владимир Леонов Татарстанда спортның адаптив төрләре үзәген булдыру теләген белдерде

Татарстанда спортның адаптив төрләре үзәген булдыру идеясен тикшерәләр. ТР спорт министры Владимир Леонов ТР Иҗтимагый палатасында ТР Спорт министрлыгының максатлары турында фикер алышуда шул хакта хәбәр итте.

«Безнең барлык коллективлар үз йортларын тапсын өчен, адаптив спорт төрләре үзәген булдыру турында сөйләшүләр алып барабыз, әлегә бездә андый урын юк», - диде ул.

Шул исәптән бу урын Россия чемпионатында икенче ел рәттән алтын медальләр яулаган коляскалы баскетбол буенча «Крылья Барса» командасына күнегүләр үткәрү өчен локация булырга да мөмкин, дип өстәде министр.