Qashqadaryoda IIB olib ketgan fuqaro vafot etdi. Uning “alkogoldan" o‘lgani iddao qilinmoqda
Joriy yilning 11 - fevral kuni Qashqadaryo viloyat, Mirishkor tuman, “Chandir” mahallasida yashovchi Yusuf Sultonov IIB xodimlari tomonidan olib ketilgan va oradan 6 soat o‘tib, yaqinlari uning o‘lganidan xabar topishgan.
Voqea guvohlariga ko‘ra, 37 yashar Yusuf Sultonov o‘sha kuni mast bo‘lib janjal chiqargani bois qo‘shnilari uning ustidan IIBga shikoyat qilgan.
Mirishkor IIBsiga ko‘ra, Sultonovni tekshirish uchun narkologiya dispanseriga olib borishgan payti uning sog‘ligi og‘irlashib, kasalxonaga yotqizilgan va shu yerda uning joni uzilgan.
Marhumning yaqinlari Sultonovning o‘limiga unga nisbatan IIB xodimlari tomonidan kuch qo‘llangani sabab bo‘lganini taxmin qilishmoqda.
Sultonovni uyidan olib ketgan IIB mayori Ozodlik bilan suhbatda marhumga nisbatan kuch qo‘llanilmagani, "u me’yoridan ortiq alkogol ichgani sabab" o‘lganini iddao qildi.
IIB olib ketgan yigitning uyga o‘ligi keldi
Voqea guvohlariga ko‘ra, Yusuf Sultonov 11 - fevral kuni kechki soat 5larda mast bo‘lib uyida janjal chiqargan, keyin qo‘shnilari bilan ham janjallashgan.
Qo‘shnilardan biri IIBga qo‘ng‘iroq qilib, Sultonov ustidan shikoyat qilgach, “Chandir” MFY profilaktika nozirlari yetib kelgan.
Nozirlar Yusuf Sultonovni uyidan olib ketganidan taxminan 6 soat o‘tib, yaqinlari uning o‘lganidan xabar topishgan.
12 - fevral kuni ertalab Yusuf Sultonovning jasadi uyiga olib kelingan va shu kuni u dafn qilingan.
Marhumning yaqinlari Ozodlik bilan suhbatda Sultonovning o‘z ajali bilan o‘lganiga shubha qilishlarini aytishdi.
“Mast bo‘lgani uchun ahvoli og‘irlashib o‘lganini aytishdi. Yusuf shu paytgacha ham g‘irt mast bo‘lguncha ichardi. Birovga tuhmat qilishga qo‘rqaman. Lekin IIB olib ketganidan so‘ng uning o‘lgani baribir shubha tug‘diradi”, -dedi marhumning yaqinlaridan biri.
Marhumning boshqa bir yaqiniga ko‘ra, IIB xodimlari Sultonovning o‘limida ularning aybi yo‘qligini va “Sultonov aroq ko‘p ichib qo‘ygani uchun komaga tushib o‘lgani”ni aytishgan:
"Ma’rakada xotini va bolalarining dod-faryodiga chidab bo‘lmadi. Yusuf oilasini mardikorlik orqasidan boqardi. Juda kambag‘al yashashadi. Uyining deraza va eshiklari ham yo‘q. Dafn kuni mahalla-ko‘y uyiga eshik o‘rnatib berishdi. Marakalarning harajatlarini ham qo‘shnilari ko‘tardi. Oilada bir so‘m ham pul yo‘q ekan. Xotini hech qayerda ishlamaydi. Endi qanday kun ko‘rishadi, hayronman. Yusufning xotini bilan hatto zagsi yo‘q edi. Bir qiz, bir o‘g‘li bor. Ikkala bolada ham shu paytgacha tug‘ilganlik guvohnomasi yo‘q. Qizi yaqinda maktabni bitiradi. Hech bo‘lmasa, bolalariga hokimlik hujjat qilib bersa bo‘lardi. IIB kelib, "tushuntirish" o‘tkazibdi, "Yusuf aroqdan o‘ldi" debdi".
Mayor izohi: Sultonov alkogoldan o‘ldi
Ozodlik Yusuf Sultonovni 11 - fevral kuni uyidan olib ketganlardan biri - IIB mayori bilan suhbatlashdi:
“11 - fevralda Sultonovning qo‘shnisidan vizov tushdi. Yordamchilarim bilan uni avval mahalladagi tayanch punktiga olib bordik. Qo‘shni ariza yozdi. Sultonovni viloyat narkologiya dispanseriga olib borib, mastlik darajasini aniqlash uchun “Aloqa xati” to‘ldirdik. ROVDga qo‘ng‘iroq qilib, xatni qaydga oldirib, “chiqim” qildik. Keyin uni mashinada narkologiyaga olib bordik. O‘sha yerda mazasi qochgach, Shoshilinch tibbiy markazga olib bordik, u yerda 2 soatcha yotgach, o‘lgan”.
Mayor marhumning o‘limida iibchilarning aybi yo‘qligini iddao qildi:
“Mashinada Qarshiga borguncha uxlab bordi. Hozir har-xil gaplar chiqyapti. Lekin biz unga qo‘limizni ham tekkizmadik. Agar mazasi yo‘qligini aytganida, to‘g‘ri kasalxonaga olib borardik. Uning qonida me’yoridan ortiq alkogol borligi aniqlandi. Ekspertiza ham qilindi. Lekin hali beri ekspertiza xulosasi chiqmaydi, uni kutish kerak. Holatni prokuratura o‘rganyapti”.
IIB mayori marhumning oilasi bilan “tushuntirish” o‘tkazilganini ham aytdi:
“Oilasi bilan gaplashib, tushuntirish o‘tkazdik. Sultonov kasalxonada alkogol komasiga tushgani sabab o‘lgan. Yaqinlari tushundi. Da’voi yo‘q bizga. O‘zi Sultonov profilaktika nazoratida edi. U avvalroq narkologiyada yotib, davolanib ham chiqqan. Keyin xotinini urgani uchun hokimlik uning xotiniga “himoya orderi” bergan. Lekin Sultonov baribir xotiniga qo‘l ko‘targani uchun o‘tgan yozda 15 sutka o‘tirib ham chiqqan”.
Qashqadaryo viloyat narkologiya dispanseridan Yusuf Sultonovga oid biror ma’lumot olish imkoni bo‘lmadi.
Qashqadaryo Shoshilinch tibbiy yordam markazi xodimlaridan olingan ma’lumotga ko‘ra, dastlabki tibbiy tekshiruvlar Sultonov "alkogoldan vafot etganini ko‘rsatgan".
"Bemor Sultonovda "alkogol abstinent sindromi" bo‘lgan. Keyin u "alkogolnaya koma" holatida bo‘lgan. Bu faqat dastlabki tibbiy xulosa. Hammasi ekspertizadan keyin aniq bo‘ladi", dedi matbuotga gapirish vakolati yo‘qligi sabab ismi ochiqlanmasligini so‘ragan shifokor.
Mirishkor tuman Ichki ishlar bo‘limi ma’lumoti bo‘yicha, 11 - fevral kuni Yusuf Sultonov IIB binosiga olib kelinmagan. Uni profilaktika nozirlari "Chandir" mahallasidan to‘g‘ri Qarshiga olib ketishgan.
“Yusuf Sultonov Mirishkor tumani IIBga olib kelinmagan va u bu yerda o‘lmagan. Profilaktika nozirlari "Aloqa xati"ni telefon qilib "Chiqim" qilishgan” dedi navbatchilik qismi xodimi Ozodlik bilan suhbatda.
Mirishkor IIB xodimlariga ko‘ra, Yusuf Sultonov o‘limi bo‘yicha Qarshi shahar prokuraturasi tergovoldi surishtiruvlarini olib bormoqda.
Bosh prokuratura matbuot xizmati rahbari Hayot Shamsuddinovga Yusuf Sultonov o‘limi bo‘yicha qo‘shimcha ma’lumot berishni so‘rab, murojaat qildik. Hozircha biror izoh berilmadi.
Qashqadaryo militsiyasi bilan bog‘liq o‘limlar
Qashqadaryoda IIB xodimlari fuqarolar o‘limida ayblangan holatlar avval ham kuzatilgan.
O‘tgan yilning 25 - iyul kuni Qashqadaryo viloyati Nishon tumani IIBning huquqbuzarliklar profilaktikasi bo‘limiga olib kelingan fuqaro Nursoat Muhammadiyevning jasadi yaqinlariga topshirildi. IIB organi uning viloyat narkologik dispanserida vafot etgani, marhumning yaqinlari esa uning urib o‘ldirilganini iddao qildi, qiynoq izlari borasidagi vajlar tekshirilmadi.
2020 - yilning sentabrida jinoyat ishlari bo‘yicha Qashqadaryo viloyat sudi Chiroqchi tumanida mol o‘g‘irlaganlikda gumon qilinib, IIB binosiga olib ketilgan va o‘sha yerda kaltaklanishdan vafot etgan 32 yoshli Yusuf Abdurahmonov o‘limida ayblangan besh nafar militsiya xodimiga 4 yildan 9 yilgacha qamoq jazosi tayinlagan.
2013 - yilda Qashqadaryo viloyatining Yakkabog‘ tumani Chordara qishlog‘ida yashovchi 32 yoshli Husniddin Oqqo‘ziyev Chiroqchi tumani Ichki ishlar bo‘limi xodimlari tomonidan qiynoqqa solingani oqibatida vafot etgani xabar qilingan.
2012 - yilda Qashqadaryo viloyati Chiroqchi tumani O‘makay MFYda yashovchi 31 yashar Alimardon Berdiqulov Chiroqchi tumani militsiyasida qiynoqdan nobud bo‘lgan va militsiya xodimlari javobgarlikka tortilgan.
O‘zbekiston “Qiynoqlarga qarshi konvensiya”ga qo‘shilgan va o‘z aholisini qiynoq jinoyatlaridan himoya qilish majburiyatiga ega.
O‘tgan yilning 26 - iyun kuni prezident Mirziyoyev "Qiynoq qurbonlarini qo‘llash xalqaro kuni”da qiynoqlarning oldini olish tizimini takomillashtirish to‘g‘risidagi yangi qarorni ham imzoladi.
Shunga qaramasdan mamlakatda qiynoq holatlari to‘xtamayapti.
Prezident qaroridan so‘ng Denov, Nishon va Taxiatoshda fuqarolarni qiynash bilan bog‘liq jinoyatlar sodir etildi. Har uchala hodisa odam o‘limi bilan yakun topdi.
Mazkur o‘limlar yuzasidan izoh bergan O‘zbekiston Ichki ishlar vazirligi matbuot xizmati rahbari Shohruh G‘iyosov qiynoq qurbonlarining o‘zlarini ayblab chiqdi.
Mirziyoevning yangi qaroriga ko‘ra, Ombudsman huzurida qiynoqlarni aniqlash bo‘yicha guruh tashkil etildi. Endilikda jabrlanganlarga yordam ko‘rsatish va yetkazilgan zararni kompensatsiya qilish tizimi yo‘lga qo‘yiladi.
Hozirga qadar o‘lim bilan yakun topgan qiynoq holatlari yuzasidan bir necha IIB xodimi ishdan chetlatilgan, ammo bironta ham yuqori martabali mulozim shaxsiy javobgarlikni zimmasiga olmagan. O‘tgan yili Andijon va Qashqadaryo viloyatlarida gumondorlarning qiynab o‘ldirilishi hodisalari ortidan ijtimoiy tarmoqlarda Ichki ishlar vaziri Po‘lat Bobojonovning iste’fosiga chaqiriqlar yangragandi.