Миржалол Қосимов: "Мақсадимиз Осиё Чемпионлар лигасига йўлланмани қўлга киритиш ҳисобланади" — Бизга қўшилинг: ???? https://t.me/joinchat/AAAAADwt0NGCRoONT4f1_Q

Coca Cola Суперлигаси 22-тури доирасидаги "Бунёдкор" – АГМК учрашувидан сўнг меҳмонлар бош мураббийи Миржалол Қосимов матбуот анжуманида иштирок этди. Ўйин ҳақида — Бугунги ўйин биз учун жуда керакли эди. Ҳали ҳеч нарса йўқотилмаган, қолаверса, учрашув биз хоҳлагандек ўтди ва баҳс давомида "Бунёдкор"га имконият қолдирмадик ҳамда муҳим уч очкони қўлга киритдик, негаки, мақсадимиз Осиё Чемпионлар лигасига йўлланмани қўлга киритиш ҳисобланади. Ҳали олдимизда тўртта ўйин бор. Шогирдларим бугун кўнгилдагидек ҳаракат қилди, тўпни назорат қилди, қолаверса, яхши комбинациялар ташкил этишди. Учрашув бошида тўп киритдик. Иккинчи бўлимда ҳам бир қанча имкониятларга эга бўлдик ва улардан фойдаланишимиз лозим эди. Афсуски, уларнинг барчасини голга айлантира олмадик. Аввалги баҳсларда ҳам вазиятлар яратиб, гол уришда муаммоларга дуч келдик. Бироқ бугун муҳим бўлган уч очко соҳибига айландик. Йигитларга, шунингдек, бизга далда бўлиб турган мухлисларга ўз миннатдорчилигимни билдираман. — Муҳаммаданас Ҳасанов ҳақида қандай фикрдасиз, чунки у ўтган йили "Қўқон-1912" сафида стандартларни яхши ижро этарди, аммо пойтахтга келиб, рақобатга мослаша олмаётгандай туюлмоқда... — Рақобатсиз футбол яхшиликка олиб келмайди. Муҳаммаданас машғулотларда ҳам яхши ҳаракат қилмоқда. Лекин ўйинлар қандай тарзда кечишини билиб бўлмайди. Масалан, биринчи бўлимда Мираҳмадовнинг ўйини қовушмади, шу боис, танаффусни уни алмаштирдим. Фақат ўз устида ишлаш керак, бошқа йўли йўқ. Ҳасановга эътирозим йўқ, у сидқидилдан ҳаракат қилмоқда. Ҳамма нарсани вақт кўрсатади. — Суперлигада ротациянинг энг яхши кўрадиган мураббийлардан бири ҳисобланасиз. Бироқ Хуршид Ғиёсов асосий таркибда доимий майдонга тушади. Бугун баъзи вазиятларда хатога йўл қўйди. Унга доимий ўйин амалиёти берилиши ўйин услубингизга мос тушишиданми ёки бошқа сабаб борми? — Ғиёсов тўп билан яхши муомала қила олади. Нафақат, Хуршид, балки қўл остимдаги барча футболчиларга асосий таркиб кафолатланмаган. Бироқ у шериклари билан бир-бирини яхши тушунади. Ўйин давомида ўзгача услубда ҳаракат қилиб, жамоага фойдаси тегади. Унинг ўзига ҳам айтдим, Хуршиднинг ўйинида пасайиш бор. Лекин бу оддий ҳол. Чунки футболчиларимизни рақиб жамоа ҳам ўрганади. Бу ҳам сабаблардан бири бўлиши мумкин.