Одатда санъаткорлар мухлислар қувончига шерик бўлишади. Мухлислар ҳам севимли ижодкоридан фақат позитив кайфият кутишади. Аммо машҳурлар ҳам ҳамма қатори оддий инсон. Уларнинг ҳам ўзига яраша ташвишлари, дардлари бор. Қуйида сизга ҳаётида оғир жудоликка учраганига қарамай, кулиб халқ хизматида бўлишга мажбур бўлган санъаткорлар ҳақида ҳикоя қилмоқчимиз. Хосият Ҳусанова онаси вафот этганини Самарқанддаги тўйда эшитган Фото: Zamin.uz Актриса Хосият Ҳусанова онаси вафот этганини Самарқанддаги тўйда эшитгани ва шошиб Андижондаги ота ҳовлисига келгани ҳақида сўзлаб берди. - "Онам кетма-кет инфаркт ва инсульт хасталигига чалиниб, даволангач, аҳволи бироз яхшиланганди. Аммо орадан ҳеч қанча вақт ўтмай яна хасталик қайталади. Онамни кўргани борсам, «Мен ўламан, тайёр тур. Фақат бир илтимос ўлганимдан кейин ҳам уйимга келиб, жигарларингни тўплаб Қуръон тиловат қилгин. Кейин яқинларингга берадиган моддий ёрдамингни тўхтатмагин», деди. Аксига олиб эртанги спектаклда иштирок этишим керак эди, дублёрларим эса ўрнимга чиқишга вақтлари йўқлигини айтишган. Аксига олиб, ўша вақт театрдан тинмай қўнғироқ қилишди. Ўшанда онам ‘Қачон ўлишим номаълум, ишдан қолма’, деб пойтахтга кетишимга кўндирди. Спектакльда рол ўйнаб, эртаси куни тонгда Самарқанддаги тўйга кетганман. Тўй авжида, бирор хабар келса деб телефонимни қўлимдан қўймайман. Шу пайт уйдан қўнғироқ бўлди ва онам омонатини топширганини айтишди. Микрафонни ёрдамчи ҳофизга бериб, ичкари хонага кирдим ва чуқур нафас олдим. Ортимдан тўй эгалари кириб, нима бўлганини сўрашди. Онам ўлганини билишгач, тўйни тугатмасдан кетишимга рухсат беришди. Ҳақ олмайман, дейишимга қарамай, пулни очиқ машина эшигидан ташлаб, ‘Сизнинг ҳаққингиз, биз розимиз’, дейишганди. Самарқанддан Андижонга келгунча ичимдан нималар ўтганини тасвирлаб беролмайман", — дейди актриса. Ҳосила Раҳимова отасидан жудо бўлганидан кўп ўтмай, концерт берган Фото: Instagram / @hosila_singer Ўзбекистонда хизмат кўрсатган артист Ҳосила Раҳимованинг отаси Иброҳим ҳожи 2006 йилнинг 10 март санасида вафот этган. Хонанда орадан ҳеч қанча вақт ўтмай, «Халқлар дўстлиги» санъат саройида янги концерт дастурини намойиш этган. «Отамнинг ўлими оиламиз учун оғир зарба бўлган. Кўнглимга ҳеч нима сиғмайдиган аҳволда бўлсам ҳам байрам дастурларида иштирок этишга мажбур бўлганман. Энг ёмони яккахон концерт дастуримга ҳам ҳеч қанча вақт қолмаганди. Уни ортга сурсаммикан, деб ўйладим, аммо атрофимдаги инсонлар кўнишмади. Кўнглимга қил сиғмайдиган пайтда концертда қўшиқ айтиб куйлаганман. Ота ҳақидаги қўшиқни айтганимда бутун зал йиғлаган, аммо саҳна этикасига хилоф иш қилмаслик учун ўзимни қўлга олганман. Саҳнада кулиб, концертдан кейин роса йиғлаганман», — дейди хонанда. Отабек Мирзахолов: «Отам вафот этганида концертда чиқиш қилишга Жаҳонгир Позилжонов кўндирган» Фото: Instagram / @otabekmirzaholov «Браво» жамоасининг аъзоси Отабек Мирзахолов учун 2018 йилги концерт жуда қийин кечган. Чунки концерт бошланишидан бир кун аввал Отабекнинг падари бузруквори вафот этган. «У кунларни эслаш мен учун жуда оғир. Концертга тайёргарлик авжида эди, 10 сентябрь куни тонгда отам вафот этди. Йиғлаб туриб, одамларни кулдириш осон эмас. Шу боис, концертга чиқмайман, дедим. Аммо бир кун қолганда концерт режасини ўзгаритириш ҳамкасбларим учун ноқулайлик туғдиришини ҳам яхши билардим. Ўшанда устозим Жаҳонгир Позилжонов келиб, онам билан узоқ вақт суҳбатлашганди. Кейин мени чақиришди. Ўшанда мен қабристондан эндигина қайтгандим. Хуллас, улар менга бу вазиятда ўзимни қўлга олишим кераклигини ва кўплаб санъаткорларнинг бошига худди шундай мусибат тушганини айтишди. Кечга яқин устозим ҳамроҳлигида Тошкентга йўл олдик. Ўша йилги концерт дастуридаги иштироким ниҳоятда қийин кечганди», — дейди Отабек Мирзахолов. Мавлуда Асалхўжаева: «Отам уларга атаб айтган қўшиғимни эшитишга улгурмаган» Фото: Instagram / @mavludauz Ўзбекисонда хизмат кўрсатган артист Мавлуда Асалхўжаеванинг отаси Абдураҳмон ҳофиз ҳам қизининг яккахон концерт дастури куни вафот этган. «У кун саҳнага чиқишим жуда оғир кечган. Энг алам қилгани ўша йилги дастурда илк марта отамга бағишлаб қўшиқ айтишни режалаштиргандим. Бир кун аввал укаларим қўшиқни дадамга айтиб беринг дейишганда, йўқ эртага концертда эшитадилар, дегандим. Дадам концерт учун атайин Тошкентга келганди. Неча кун бўласиз деганимда, концертининг беш кунида ҳам ёнингда бўламан деганди. Афсуски, концертнинг илк кунида — эрта тонгда жонлари узилди. Концертни қолдиришнинг иложи бўлмагани учун кўзларим шишиб катта саҳнага чиқишга мажбур бўлганман. Айниқса, отамга бағишланган қўшиқни айтганимда бутун зал йиғлаганди. Энг қизиғи, илк концерт кунида кўриниш берган капалак концертнинг бешинчи кунига қадар учиб кетмаган. Армоним ҳақида кўп сўрашади, мен ўша йилги концертда халққа отамни таништириб, унга аталган қўшиқни айтишни режа қилгандим. Афсуски, бу менга ушалмас армон бўлиб қолди. Улғайганимда етим бўлиб қолдим», — дейди хонанда. Шукурулло Исроилов: «Онам вафот этганини тўйда эшитдим» Фото: Instagram /@shukurullo_isroilovoriginal Икки ёшида отасидан айрилган қизиқчи Шукурулло Исроилов 2015 йилда онасидан ҳам айрилди. Ўша куни у Бухорода тўйда эди. — 2015 йили 27 март куни онам раҳматли 80 ёшни қаршилаганди. Онамни санаторияга даволатгани ётқизгандим, аммо эрталаб у ерга бориб табрикладим. Тандир гўшт ва ширинликлар буюртма қилиб, дастурхон ёздик. Аммо узоқ қололмадим. Чунки шу куни кечқурун Бухорода тўйим бор эди. Тўй қизиган пайтда ‘Онангиз вафот этди’ деган совуқ хабар келди. Амаллаб тўйни тугатиб Тошкентга қайтдим. 28 март куни пешинда онамга жаноза намози ўқилди. Ўша куни ‘Мирзў театрининг навбатдаги концертига старт бериларди. Мирзабек аканинг олдига келиб, концертда чиқолмаслигимни айтдим. Ҳамманинг боши қотган бир неча соатдан кейин концерт, саҳналарнинг барчаси бир-бирига узвий боғлиқ. Томошани қолдирайлик десак, чипталар тўлиқ сотилган. Шунда устозлар менга қанчалик оғир бўлса ҳам, концертда чиқишим кераклигини айтишди. Концерт бошланди, одамлар куламан деб келган мен эса ич-ичимдан йиғлайман. Аммо мухлисларга мусибатда эканимни билдирганим йўқ. Аммо Мирзабек ака концерт сўнггида ‘Шукурулло бугун онасидан айрилди, аммо сизларни ҳурмат қилиб концертга келди’, деганда бутун зал қарсак чалганди, — дейди Шукурулло Исроилов. Дилшод Мусабеков: «Йиғлаб туриб, одамларни кулдириш қийин» Фото: Instagram / @dilshodbek_musabekov_dizayn «Дизайн» кулги жамоасининг аъзоси Дилшодбек Мусабеков 2012 йил отаси вафот этган куннинг эртасига концерт дастурида иштирок этишига тўғри келган. Афсуски, касб масъулияти сабаб, у дардини ичга ютиб, халқни кулдиришга мажбур бўлган. «Дадамни йўқотиш жуда оғир бўлган. Эртаси куни концерт бўлиши керак, аммо кўнглимга қил ҳам сиғмайдиган ҳолатда эдим. Жамоадаги йигитлар келиб, ‘Истасангиз концертни қолдирамиз. Ҳеч қандай муаммо бўлмайди, ҳавотир олманғ, дейишди. Чунки уларнинг ҳам аҳволи у қадар яхши эмасди. Биз аввалдан оилавий дўст бўлганимиз учун бир-биримизнинг қувонч-у, ғамимизга шерик эдик. Шунда онам нима бўлган тақдирда ҳам саҳнага чиқишиб кераклигини ва белгиланган концертни қолдиришга ҳаққим йўқлигини тушунтирди. Хўп, деб концертда иштирок этдим. Йиғлаб туриб одамларни кулдириш нақадар оғир эканини ўшанда билганман», — дейди Дилшодбек Мусабеков. Юлдуз Усмонова: «Тўйга чиқиб кетаётганимда ‘акангиз ўтиб қолди’, деган хабар келган» Фото: Instagram / @yulduzibragimovnausmonova Ўзбекистон халқ артисти Юлдуз Усмонова касб масъулияти сабаб катта акаси вафот этганда, тўйлар сабаб жанозага кечикиб боргани ҳақида сўзлаб берганди. «Кийиниб, тўйга чиқиб кетяпман, ‘Акангиз вафот этди’, деган хабар келди. Қотиб қолдим. Нима бўлган тақдирда ҳам ишимни тугатишим кераклигини ҳис қилиб, хизматимни кўнгилдагидек адо қилганман. Фақат охирги тўйдаги сўнгги қўшиқни айтаётганимда йиғлаб юборганман. Унгача мухлисларни дардимга шерик қилишни истамаганман. Жанозага бироз кечикиб бўлса-да, етиб борганман. Чунки бизда ҳозирги баъзи хонандаларда йўқ касб масъулияти бор. Санъаткор бундай вазиятларга ҳамиша тайёр бўлиши керак», — дейди Юлдуз Усмонова.
