Туркиянинг мафтункор Капузбаши шаршараси
Қоялик тоғдан оқиб ўтувчи етти шаршарадан иборат Капузбаши шаршараси Кайсери вилоятидаги “Аладағлар миллий боғи” ҳудудида жойлашган. Шаршаралар ёзда музли сувлари билан кўплаб сайёҳларни ўзига жалб қилади.
Капузбаши шаршараси оқим баландлиги жиҳатидан Угандадаги Виктория шаршарасидан кейин дунёдаги иккинчи энг баланд шаршарадир. Табиат мўжизаси бўлган Капузбаши шаршаралари Туркиянинг Кайсери вилоятидаги “ташриф буюрадиган жойлар рўйхати”нгизда бўлиши керак.
Капузбаши шаршараси 7 та алоҳида шаршарадан иборат бўлиб, улардан 5 таси катта, қолган 2 таси эса кичик ҳисобланади. Шаршараларнинг ҳар бири оқимни ва дарани тўйинтиришга етарли даражада кучлидир. Уларнинг баландлиги 30 дан 80 метргача. Шаршаралар оқиб ўтадиган ҳудуд 700 метрни ташкил этади ҳамда тахминан 77 метр баландликдан оқади. Капузбаши қишлоғи яқинидаги тепаликнинг шарқий ва жанубий ёнбағирларидан оқиб чиқадиган ва ажойиб сув шовқини билан Суариси оқимига қуйиладиган Капузбаши шаршаралари Заманти дарёси билан қоришади. Сув оқимининг тезлиги юқори бўлганлиги сабабли, тушган сувдан чиқадиган гранулалар кенг майдонга тарқалади. Бу музли гранулалар ёзда ўзига хос “совутгич” бўлиб хизмат қилади.
Бу шаршаранинг баландлиги нуқтаи назаридан дунёдаги кўплаб машҳур шаршаралардан олдиндадир. Масалан, Виктория шаршараси 100 метр баландликдан қуйилади ва бу кўрсаткичи билан дунёда биринчи ўринда туради. Виктория шаршарасидан кейин Кайсери вилоятининг Яҳяли туманида жойлашган Капузбаши шаршараси иккинчи ўринда туради. Дунёда Ниагара ҳамда Иматрадан, Туркияда эса Манавгат билан Дуден шаршараларидан ҳам баландроқдан қуйиладиган Капузбаши шаршараси сизга гавжум мегаполислар шовқини ва дунё стрессидан халос бўлишингиз, шунингдек ҳеч бир ерда учратолмайдиган табиатнинг сокинлиги ва шаршара оқишининг ажойиб оҳанги оғушида ўзингизни “янгилашингиз” мумкин бўлган тенгсиз муҳитни таклиф қилади.
Туристлар бу ерда нима билан шуғулланади?
Капузбаши шаршаралари бутун йил давомида юқоридан оқадиган ям-яшил сувлари билан Туркиянинг энг катта шаршараларидан биридир. Шаршара сувларининг тасалли берувчи овози ва ҳузур бағишловчи ўзига хос таъсири билан шаршаралар атрофида дам олиш масканларида пикник уюштириш ҳамда сайр қилиш маҳаллий сайёҳлар томонидан энг севимли машғулот ҳисобланади. Бундан ташқари, Кайсерининг энг машҳур треккинг маршрутида жойлашган Капузбаши шаршаралари ўзининг ажойиб манзараси билан сайёҳларга унутилмас онларни тақдим этади. Шунингдек, бу ерда муҳташам суръат ва видеолар қайд этиб, ўзингизнинг шахсий Instagram ёки Facebook каби ижтимоий тармоқлардаги саҳифангизда жойлаб, яқинларингиз билан улашишингиз мумкин!
Қандай борса бўлади?
Кайсери вилоятининг Яҳяли туманига жамоат транспортида бориш мумкин. Бироқ, шу туманга келган вақтдан бошлаб Капузбаши шаршарасига қолган 55 ёки 65 километрни шахсий транспорт воситаси билан босиб ўтиш керак. Капузбаши шаршаралари бориш қийин бўлган жойда жойлашгани учун улар ўз табиийлигини сақлайди ва кўп ифлосланмайди.