«Миллатчи бўлиб, ўзимни тарбиялаган, чемпион қилган Ватанимга қарши бош кўтардим». Нукус воқеаларида айбланаётган спортчи иқрори — Бизга қўшилинг: ???? https://t.me/joinchat/AAAAADwt0NGCRoONT4f1_Q
Азамат Турданов. Фото: Видеодан кадр Нукус воқеаларида айбланаётганлар ишини кўриб чиқаётган суд онлайн трансляцияни давом эттириб, жамоатчиликка ахборот беришда давом этмоқда. Навбатдаги суд мажлисида судланувчиларнинг якуний сўзлари тингланди. Айбланувчи Азамат Турданов якуний сўзида миллатчи сифатида ўзини тарбиялаган, жаҳон чемпиони қилган Ватанига қарши бош кўтарганини тан олди. - "Ҳурматли раислик қилувчи, суд қатнашувчилари, Лола, сенга раҳмат. Айбни тан олиш ҳам марднинг иши. Бу ҳатто унча-мунча эркак кишининг қўлидан келмайди. Сенга раҳмат. Ҳурматли раислик қилувчи, Лоланинг айтган гапларидан қаттиқ таъсирландим. Олти ой бўлди, шу ерда ўтирибмиз. Бу кунлар ҳам бошимизда бор экан. Пешонамизга ёзилган экан. Бундан 20 йил олдин мана шу ерда, Бухородаги Ўзбекистон чемпионатида ғолиб бўлиб, Жаҳон чемпионатига йўлланма олгандим. Ҳамда жаҳон чемпиони бўлиб қайтгандим. 20 йилдан кейин келиб Бухорода судланаман деб ҳеч хаёлимга келтирмаган эканман. Одамнинг бошида бор экан. Ҳақиқатни айтадиган бўлсам, Ўзбекистон ҳукуматидан, президентдан ҳеч қандай ёмонлик кўрмаганман. Қайтанга Жаҳон чемпионатига қатнашадиган жамоага сардор қилиб, менга ишонч билдиришган. Тошкентдаги мураббийларим кўриб туришган бўлса, барчаларидан узр сўрайман. Улар ўз акамдай олдимда туришди, уйларида бўлдим, тарбияларини олдим. Лола айтганидек, миллатчилик оқибатида шу кунлар бошимизга тушди. Чемпион бўлиб, Ўзбекистон байроғини елкаларимда кўтарганим бир пул бўлди. Очиғи, икки ўт орасида қолдим. Бир томонда менга таълим-тарбия берган устозларим бўлса, бир томонда халқим. Бир ойдан бери интернетга киролмаяпман. Полвонлар сенда номус борми, ор борми, дейишади. Биринчидан, ишимдан. Иккинчидан, депутатликдан воз кечиб, «халқ йиғиляпти» деб ўйлаб, президентимизнинг «Халқ дард-у ташвиши билан яшаш керак» деган сўзларини нотўғри тушуниб, намойишларга аралашиб кетдим. Миллатчи бўлиб ўзимни тарбиялаган, жаҳон чемпиони қилган, менга қанча меҳнати сингган, мени шундай даражага олиб чиққан Ватанимга қарши бош кўтардим. Мингдан минг пушаймонман. Қамоқда одамнинг куни ўтаверар экан. Олти ой, етти ой. Шу нарсани англадим, қамоқда ҳам вақт тўхтамас экан. Вақт ҳар доим олдинга юрар экан. Шу вақт, етти ой ичида ёнимдагиларни кўриш учун адвокатлар билан оила аъзолари келишди. Йиғлаб кўришиб, суҳбатлашарди. Мен эса адвокатга боролмасдим. Икки нафар ўғлим бор. Иккаласи ҳам чемпион. Уларнинг юзига қаролмадим. Бу ота учун қанчалик оғир эканлигини тушунсангиз керак. Йиғлаб дардимни айтмоқчи эмасман. Шунчаки одам билиб-билмай хатога йўл қўяр экан. Хом сут эмган бандамиз барчамиз ҳам. Қамоқда ётиб Ўзбекистон Қаҳрамони Ибройим Юсуповнинг китобларини ўқиб чиқдим. Ўзбек халқи бағрикенг халқ деганини мен унчалик ҳам тушунмасдим. Шу китобларда Ибройим отамизнинг дадалари «халқ душмани» деб қамалганида оналари, оила аъзоларига босим ўтказилган экан. Ҳозир бизда бундай бўлмаяпти. Уйдагилар, қариндошлардан тинчмисизлар, ишлаяпсизми, деб сўрадим. Менга ҳаммаси жойида эканлигини айтишди. Ҳурматли халқ, ёшлар, қорақалпоқ халқи, илтимос, кўзингизни очинг. Лола айтганидек, интернет тармоқларида бўлар-бўлмас одамларнинг гапларига эргашиб кетаверманг. Аман Сагидуллаевларга ўхшаган қўғирчоқларга ишонманг. Қорақалпоғистон, Ўзбекистон умумий уйимиз. Тинчликка етмайди", — дейди Азамат Турданов. Судланувчи шунингдек, Жўқорғи Кенгес раисига миннатдорлик изҳор қилиб, уларнинг илтимосини, пушаймонлигини давлат раҳбарига етказаётганидан мамнун эканлигини билдирди. -"Кеча Жўқорғи Кенгес раиси Аманбай Ўринбаев қанчалик иши кўп бўлишига қарамай бу ерга келиб кўрсатма берди. Ҳали бунақаси бўлмаган. Бизни тинглади. Мурожаатларимизни президентга етказишни айтди. Менимча, шунинг ўзи ҳам суднинг одил ўтаётганидан дарак", — деди у.