Туркия ва Суриядаги зилзилада икки мингдан ортиқ одам нобуд бўлди
Туркияда 6-феврал куни иккита кучли зилзила қайд этилди - эрталаб 7,8 магнитудали ва куннинг иккинчи ярмида 7,6 магнитудали ер силкиниши. Зилзилалар Туркиянинг жануби-шарқида, шунингдек, қўшни Сурия шимолида кўплаб қурбонлар ва вайронагарчиликларга олиб келди.
Тошкент вақти билан соат 20.00 ҳолатига кўра жабрланганларнинг умумий сони 2 мингдан ошди ва маҳаллий расмийларга кўра, яна кўпаяди.
Зилзила қурбонлари сони Туркияда қарийб 1500 кишига, Сурияда эса 800 нафарга етди.
Туркия президенти Ражаб Тоййиб Эрдўғон 1939-йилги зилзиладан сўнг энг кучли зилзила деб атади.
Туркияда камида 10 та йирик шаҳар жабрланган, камида 1700 та уй вайрон бўлган.
Туркиянинг Қаҳрамонмараш шаҳрида бутун бир турар-жой майдони вайрон бўлганини воқеа жойидан олинган суратлар кўрсатади.
Диярбакирда катта вайронагарчилик қайд этилди. Ижтимоий тармоқларда вайронагарчилик акс этган сурат ва видеолар жойлаштирилмоқда, айрим видеоларда эса уйларнинг қулаши жонли акс эттирилган.
Аввалроқ, тўрт соат олдин Туркия президенти Ражаб Тоййиб Эрдўған 912 киши ҳалок бўлгани, 5,4 мингга яқин киши жароҳатланганини маълум қилган эди.
Вайроналар остида яна қанча одам қолгани номаълум, чунки зилзила одамлар ухлаб ётган пайтда рўй берган. Қурбонлар сони яна кўпайиши мумкин.
Сейсмологларнинг қайд этишича, бу охирги пайтларда Туркиядаги энг ҳалокатли зилзилалардан бирига айланиши мумкин.
Зилзила Қаҳрамонмараш вилоятининг Пазаржик туманида маҳаллий вақт билан соат 4:17 да 7 км чуқурликда содир бўлган. Туркия табиий офатлар ва фавқулодда вазиятлар бошқармаси (АФАД) маълумотларига кўра, тебранишлар магнитудаси 7,4 баллни ташкил қилган.
Кейинроқ Газиантеп вилоятида 6,4-6,6 магнитудали яна учта зилзила содир бўлди. Шунингдек, сейсмологлар 22 та ер силкинишини қайд этишган.
Туркия ички ишлар вазири Сулаймон Сойлу зилзила Қаҳраманмараш, Газиантеп, Ҳатай, Усмония, Адияман, Малатя, Диярбакир каби ўнта вилоятда сезилганини маълум қилди.
Мамлакатда фавқулодда ҳолат эълон қилинди.
7,4 магнитудали биринчи зилзиладан сўнг, биргина Туркиянинг ўзида 32 та зилзила содир бўлди, улардан олтитаси 6 баллдан юқори.
Туркия ички ишлар вазири Сулаймон Сойлу камида 10 та шаҳар зарар кўрганини айтди. Диярбакирда савдо маркази қулаб тушди.
Туркия жанубидаги Ҳатай вилоятида зилзила натижасида газ қувури портлаб кетди, деб хабар берди Ihlas ахборот агентлиги.
Ер силкинишлари бир қанча ҳудудларда – Адана, Анқара, Анталия, Газиантеп, Кайсери, Мерсин, Трабзон, Урфа, шунингдек, бутун минтақада – Кипр, Ливан ва Сурияда сезилиб, Туркиядаги каби кўплаб одамлар ҳалок бўлди.
Рейтерс хабарига кўра, Сурия давлат матбуоти Алеппо вилоятида кўп сонли бинолар қулаганини маълум қилган. Сурия ҳукумати маълумотларига кўра, 237 киши зилзила қурбони бўлган, яна 639 киши жароҳатланган.
Суриянинг Хама шаҳрида саккиз қаватли бино қулаб тушди. Қутқарувчилар вайроналарни тозаламоқда. SANA агентлигига кўра, Латакияда ҳам вайронагарчиликлар кузатилмоқда.
Гувоҳларнинг айтишича, Дамашқда, шунингдек, Ливаннинг Байрут ва Триполи шаҳарларида одамлар уйлар қулаб тушишидан хавфсираб, машинларда узоқроқ жойга борганлар. Ер силкинишлари Арманистон-Грузия чегарасида ҳам сезилган.
Турк Қизил ярим ой жамияти раҳбари Керем Киник Туркия халқаро ёрдамни қабул қилишга тайёрлигини билдирди.
Ғазиантепада ЮНЕСКОнинг Жаҳон мероси рўйхатига киритилган тарихий қалъа зилзила оқибатида қулаб тушди. Бу ҳақда Туркиянинг Yeni Safak газетаси хабар берди. Қалъанинг деворлари ва миноралари вайрон бўлган, уларни қайта тиклаш мумкинми ёки йўқми, ҳали номаълум.
У илк бор Хет подшоҳлиги даврида қурилган. II-III асрларда қалъа римликлар томонидан қайта қурилиб, кенгайтирилган. Ўз тарихи давомида қалъа кўп марта қайта тикланган ва 2000-йилларнинг бошларида амалга оширилган реставрация натижасида ўзининг якуний шаклини олган. У панорамали музей сифатида ишлатилган.
Сурияда ЮНЕСКОнинг Жаҳон мероси рўйхатига киритилган Ҳалаб қалъаси ҳам вайрон бўлди.
Туркия дунёдаги энг фаол сейсмик зоналардан бирида жойлашган. 1999 йилда мамлакат шимоли-ғарбидаги Измир минтақасида содир бўлган кучли зилзила оқибатида 17 мингдан ортиқ одам ҳалок бўлган эди.
АҚШ Геология хизмати, Қаҳраманмарашдаги зилзила Туркияда охирги юз йилдаги энг кучли зилзилалардан бири эканлигини қайд этди. Америкалик геологлар буни 1939 йилда Туркия шарқида содир бўлган ва 30 мингдан ортиқ одамнинг ҳаётига зомин бўлган 7,8 магнитудали зилзилага таққослаган.