Остонада норозилик акциясига чиққан нефтчилар тутиб кетилди
Қозоғистон пойтахти Остона шаҳрида 11 апрель куни куч ишлатар тузилмалар ходимлари Энергетика вазирлиги биноси олдида норозилик намойиши ўтказаётган манғистаулик нефтчиларни қўлга олди. Озодликнинг қозоқ хизмати хабарига кўра, норозилар автозакларга ўтқазилиб, полиция бўлимларига олиб кетилган.
Қўлга олинганлардан 20 га яқини айни пайтда Остонанинг Олмаота тумани полиция бўлимида тутиб турилибди.
“БерАли Мангистау Company” ширкатининг 80 дан зиёд собиқ ходими 10 апрелдан буён вазирлик биносини олдида акция ўтказаётган эдилар. Манғистау вилоятидан келган бу одамлар амалдорлар ва “ҚазМунайГаз” ширкати вакилларига саволлари борлигини билдирганлар.
Сешанба куни “ҚазМунайГаз” вакиллари ўнга яқин норозини ширкат биносига музокарага таклиф этишган, бироқ музокара муваффақиятсиз якунланган.
Маълумотларга кўра, норозиларга пудрадчи ташкилотларда иш таклиф этишган — улардан 90 нафарига бир ширкатда, яна 150 нафарига эса бошқа ширкатда иш ваъда қилинган. Ишчилар бу ишларнинг ҳаммаси “яна вақтинча” эканини айтишиб, таклифларни рад этишган, чунки уларга иш бериши керак бўлган ширкатлар фақат 9 ойлик тендер ютиб олишган.
Ишчилар доимий иш ўрни талаб қилишмоқда. Улар ўзларига 70 фоизга кам ҳақ таклиф этишаётганини билдиришган ва “Озенмунайгаз”дагидай ойлик эвазига ишлашга розимиз”, дея қўшимча қилишган.
Остонада акция ўтказаётган нефтчилар ушлаб кетилгани ортидан Манғистау вилоятининг турли жойларида, хусусан, Жанаозенда норозилар йиғила бошлаган. Улар Энергетика вазирлиги биноси олдидан тутиб кетилган намойишчилар қўйиб юборилишини талаб қилишмоқда.