Қозоғистоннинг бир қанча шаҳрида одамлар жанаўзенлик нефтчиларни дастаклаб кўчаларга чиқишди
Қозоғистоннинг Жанаўзен ва Ақтау шаҳарларида 12 апрелга ўтар кечаси минглаб одам пойтахт Остонада тутиб кетилган нефтчиларни қўллаш учун кўчага чиқишган, дея хабар қилди Озодликнинг қозоқ хизмати.
Остона шаҳрида 11 апрель куни куч ишлатар тузилмалар ходимлари Энергетика вазирлиги биноси олдида норозилик намойиши ўтказаётган жанаўзенлик нефтчиларни тутиб кетгани ҳақида Озодлик аввалроқ хабар қилган эди.
Жанаўзен ва Ақтауда кўчага чиққан одамлар расмийлардан қўлга олинган нефтчиларни озод қилишни сўрашган. Чоршанба тонгида полиция Жанаўзендаги автойўлни тўсиб қўйган одамларни тутиб кетган. Расмий баёнотга кўра, “транспорт ҳаракатига тўсқинлик қилган” бу одамлар полиция бўлимига олиб борилган, кейин эса қўйиб юборилган.
Олмаота шаҳридаги Республика майдонига ҳам 12 апрель куни бир гуруҳ фаол жанаўзенлик нефтчилар атрофидаги вазият юзасидан ўз позициясини билдириш учун йиғилган.
Маҳаллий фаол Асилбек Қараевга кўра, ишсизликдан шикоят қилиб Остонага борган жанаўзенликлар норозилиги аёвсиз бостирилган, Энергетика вазирлиги биноси яқинида бу одамларга ҳайвонлардек ҳужум уюштирилган. Кечаси билан полиция бўлимида ушлаб турилган норозилар, маълумотларга кўра, чоршанба куни эрталаб Жанаўзенга кетадиган поездга чиқариб юборилган.
Фаоллар фикрича, расмийлар ўтган йил бошида рўй берган “қонли январ”дан ўзлари учун сабоқ чиқаришмаган.
Олмаота майдонида йиғилганлар расмийлардан Остонада норозилик акцияси ўтказган жанаўзенликларни доимий иш ўрни билан таъминлаш, улар билан мулоқотга чиқмаган энергетика вазирини ишдан бўшатиш ҳамда 15 суткага ҳибс этилган Нуржан Альтаевни озод қилишни талаб қилишган.