Расман: Косонда 14 ёшли қизини аёвсиз калтаклаган ота-онага жиноят иши қўзғатилди
Қашқадарёнинг Косон туманида содир бўлган ҳолат юзасидан Жиноят кодексининг 110-моддаси (Қийнаш) билан жиноят иши қўзғатилди, деб хабар берди Бош прокуратура 19 апрель куни кечқурун.
“Ҳозирда бир нафар гумонланувчи шахс процессуал тартибда ушланди. Тергов ҳаракатлари олиб борилмоқда”,- дейилади расмий билдирувда.
Аввалроқ ижтимоий тармоқларда ота ва она ўсмир қизалоқни томорқада ортидан қувиб юриб аёвсиз калтаклаётгани, қизалоқ эса чинқириб йиғлаётгани ва қочаётгани акс этган видео тарқалган эди. Бу воқеани видеога олаётган кишининг кадр ортидан “Қаматаман, оилавий қаматаман, санлани. Ҳозир чақираман, съёмка қилдим ҳозир”, деган овози эшитилади.
Қашқадарё вилояти ИИБнинг билдиришича, бу воқеа 16 апрель куни тахминан соат 11:30 ларда содир этилган. Видеода 2009 йилда туғилган Х.Г., 1982 йилда туғилган онаси. М.М., ҳамда 1978 йилда туғилган отаси. Т.Р., томонидан калтаклангани акс этган.
“Мазкур ҳолат вояга етмаган қизнинг амакиси томонидан видеотасвирга олиниб, Ички ишлар органларига хабар берилган. Ҳозирда воқеа иштирокчиларининг барчаси аниқланиб, терговга қадар текширув ишлари олиб борилмоқда”,- дейилади расмий билдирувда.
ИИБнинг маълум қилишича, қизнинг отаси Т.Р., руҳий касалликлар диспансерига текшириш учун юборилган. Жабрланувчи Х.Г.,га нисбатан етказилган тан жароҳатларини аниқлаш учун суд-тиббий экспертизаси тайинланган.
Ижтимоий тармоқларда тарқалган, лекин ҳозирча расман тасдиқланмаган хабарларда айтилишича, "қизалоқ ўғай онаси томонидан мунтазам калтаклаб келинган ва у бу хўрликлардан қочиб рухсатсиз амакисининг уйига келган". Қизнинг ота-онасини айни мана шу ҳолат ғазабга солган.