Беларусда NEXTA нашри собиқ бош муҳаррири Роман Протасевич афв этилди
Беларусда мухолифатдаги NEXTA нашрининг собиқ бош муҳаррири – яқиндагини 8 йилга қамалган Роман Протасевич афв этилган. Бу ҳақда давлатга қарашли БелТА агентлиги хабар қилди.
Май ойи бошида Минск суди Протасевични ҳокимиятни эгаллаб олиш ва оммавий тартибсизлик уюштириш мақсадида бошқалар билан тил бириктирганликда айбдор деб топганди. Прокуратура суддан уни 10 йилга озодликдан маҳрум этишни сўраган.
NEXTA иши бўйича бошқа икки айбланувчи сиртдан судланган. Хусусан, суд ҳукми билан Степан Путило 20 йилга, Ян Рудик эса 19 йилга озодликдан маҳрум этилган.
NEXTA Беларусда 2020 йилда бўлиб ўтган норозилик чиқишларини ёритгани ортидан машҳур бўлиб кетган эди. Канал таъсисчилари бўлган Степан Путило ва Роман Протасевич полиция ходимлари ва шахсан Александра Лукашенконинг фуқароларга нисбатан тутумини кескин танқид қилишган. Уларнинг ҳар иккиси экстремистик фаолиятга алоқадор шахслар рўйхатига киритилганларидан кейин мамлакатни тарк этишганди.
Протасевич ва унинг севгилиси бўлган россиялик Софья Сапега 2021 йил май ойида Ryanair учоғининг Минскка фавқулодда қўндирилиши ортидан ҳибсга олинган. Қўлга олинганидан кўп ўтмай Протасевич Беларусь давлат ОАВда собиқ сафдошларини танқид қилиб, чиқишлар қила бошлаган. Ҳибсга олинганидан бир муддат ўтгач, Протасевич Беларусь телевидениеси эфирида ўзига қўйилган айбловларнинг барчасини бўйнига олиб, осойишта ҳаёт кечиришни исташини билдирган.
Кейин у Лукашенко режимига хайрихоҳ бўлган “Тизимли ҳуқуқ ҳимояси” ташкилоти билан ҳамкорлик қила бошлаганини очиқлаган. Софья Сапега Беларусь суди олти йилга озодликдан маҳрум қилган. Лукашенко уни афв этишдан бош тортган. Сапега ўзининг Россияга экстрадиция қилинишига рози бўлган.
Беларусь Олий суди NEXTA, NEXTA Live ва Luxtа телеграм каналларини “террористик ташкилот” деб топган. Ҳозирда бу каналлар фаолияти мамлакат ҳудудида тақиқланган.