«Лепснинг концертига билет сотиб олган ҳар бир ўзбекистонлик билвосита қотил»
Аввал хабар қилганимиздек, россиялик хонанда Григорий Лепснинг «Халқлар дўстлиги» саройида октябрь ойида бўлиши режалаштирилган концерт дастури бекор қилинди. Сал аввал эса, хонанданинг Қирғизистоннинг Чўлпон-Ота шаҳрида 2 август куни бўлиб ўтиши керак бўлган концерти ҳам бекор бўлгани хабар қилинди.
Жамоатчилик фаоли, Экология, атроф-муҳитни муҳофаза қилиш ва иқлим ўзгаришлари вазири маслаҳатчиси Расул Кушербаев Лепснинг бекор бўлган концерти ҳақида «икки оғиз» фикр билдирди.
«Шахсан мен бу ишдан хурсандман. Чунки Лепснинг концертига билет сотиб олган ҳар бир ўзбекистонлик билвосита қотил, босқинчи рус армиясини молиявий қўллаб-қувватлаган бўларди.
Айнан Лепс кабиларнинг кўмаги туфайли кеча тунда рус қўшини Львов шаҳрида ухлаб ётган тинч аҳолининг уйларига ҳужум қилиб, кўплаб болалар ва катталарни ўлдирди ва ўлдиришда давом этмоқда.
Афсуски Лепс кабиларнинг концертига кириш яна кўплаб бегуноҳ одамларни ўлдирилишга йўл очиб беради.
Шу боис, ақли расо, гуманист ҳар бир инсон бу зулмга қарши чиқа олмаган тақдирда ҳам унга қўшилиш, шерик бўлишдан тийилмоғи лозим», – дея ёзиб қолдирди собиқ депутат.