Ўзбекистон сўнгги ўн ойда рекорд даражада олтин сотди

Ўзбекистон 2023 йилнинг 10 ойи ичида 6 миллиард 870 миллион долларлик олтин сотди. Бу 2022 йилда экспорт қилинган олтин миқдоридан 1,6 баробарга кўпдир.

Статистика агентлигининг билдиришича, бу сўнгги олти йилдаги энг катта кўрсаткичдир. Жумладан, Ўзбекистон 2022 йилда 4,11 миллиард долларлик, 2020 йилда эса 5,8 миллиард долларлик олтин сотган эди.

Олтин мамлакат ялпи экспортининг 33,6 фоизини ташкил қилган. Биргина октябрь ойида 1 миллиард 230 миллион долларлик олтин сотилган.

Статистика агентлигининг маълум қилишча, жорий йил январь-октябрида Ўзбекистон ташқи савдо айланмаси 50,93 миллиард долларни ташкил қилган. Бу ўтган йилнинг шу даврига солиштирганда 25,2 фоизга ёки 10,26 миллиард долларга кўпдир.

Ташқи савдо айланмасида экспорт 20 миллиард 470 миллион долларни, импорт 30,5 миллиард долларни ташкил қилган.

Олтин экспорти ўсган бир пайтда саноат товарлари экспорти 23 фоиздан 16,5 фоизга тушиб қолган.

Мева-сабзавот экспорти 964,7 миллион долларга (+6,1%), ғалла сотиш 408 миллион долларга (+54,8%), автомобиллар учун эҳтиёт қисмлар экспорти 312,8 миллион долларга (+34,8%) кўпайган.

Шу билан бир қаторда нефть ва нефть маҳсулотлари импорти 1,25 миллиард долларга (+25,6%), кўмир, кокс ва брикет импорти 161,2 миллион долларга (+73,2%) кўпайган.

Газ импорти 2,1 баробарга ўсиб, 561,7 миллион долларни ташкил қилган. Сентябрда 286 миллион долларлик, октябрда эса 73,8 миллион долларлик газ сотиб олинган.