Қирғизистонда ўзини “янги худо” деб атаган эркак ўлик ҳолда топилди

^{Фото: Қирғизистон Марказий сайлов комиссияси матбуот хизмати}

Қирғизистонда ўзини “янги худо” деб атаган Арстан Алай 31-сонли жазони ижро этиш колониясидаги камерада ўлик ҳолда топилди. Бу ҳақда 24.кг хабар берди.

Адвокат Арстанбек Абдилдаевга кўра, унинг ҳимояси остидаги шахс Жиноят-процессуал кодекси нормаларини бузган ҳолда ҳибсга олинган.

“Бу менинг ҳимоямдаги шахснинг хавфсизлигини таъминлаш учун тергов изолятори раҳбариятига бир неча бор ёзма мурожаат қилганимга қарамай, содир бўлди. У нега, кимнинг кўрсатмаси билан ва қачон 31-колонияга ўтказилгани бизга маълум эмас. Бир сўз билан айтганда, ҳуқуқни муҳофаза қилиш органлари, тергов, суд, ахлоқ тузатиш хизматларининг ноқонуний хатти-ҳаракатлари инсон ўлимига сабаб бўлган. Бош прокуратура раҳбариятидан барча айбдор мансабдор шахсларни жавобгарликка тортишни сўраймиз”, — деган у.

Кейинроқ жазони ижро этиш муассасаси Арстанбек Абдилдаэв (Арстан Алай) ўз жонига қасд қилгани ҳақида хабар берди. Жумладан, 5 январь куни тахминан соат 05:15 да Абдилдаэвнинг жасади 31-сонли колониянинг ошхонасида осилган ҳолда топилгани айтилган. Муассаса мурдани кўздан кечириш чоғида тан жароҳатларини аниқламаган. Ўлимнинг асл сабабини аниқлаш учун суд-тиббий экспертиза тайинланган.

Арстан Алай 2023 йил декабрда Қирғизистон Миллий хавфсизлик давлат қўмитаси ходимлари томонидан ҳибсга олинганди. Унга нисбатан Қирғизистон Жиноят кодексининг 330-моддаси “Диний адоват (нифоқ) қўзғатиш” бўйича жиноий иш қўзғатилган.

“У ўзини янги худо, қутқарувчи деб билади, бошқа динлар, эътиқод ва қарашларни нуқсонли, заиф ва нотўғри тушунчалар деб ҳисоблайди ва уларга салбий баҳо беради”, — дея муносабат билдирган ўшанда Миллий хавфизлик давлат қўмитаси.

Арстан Алай номи билан ҳам танилган Абдилдаев 2011 ва 2017 йилларда икки марта республика президентлигига номзодини қўйган.